بەرەڤان حەمدی: كارەكێ مەزن ل سەر جینۆسایدا شنگال هاتیە ئەنجامدان
بریكارێ وەزارەتا شەهید وئەنفالكریان ل هەرێما كوردستانێ دیاركركو ئەڤ قۆناغا هاتیە ئەنجامدان بۆ جینۆسایدێ، قۆناغەكا بلەز رێڤەناچیت. ژبەر رەوشا ئیداری و ئەمنی یا وان دەڤەران روودای، ئەو پێنگاڤێن هاتینە هاڤێتن دچارچووڤێ یاسایێ و زانستێ و تەنسیق و دیكۆمینت كرن گەلەك ب باشی رێڤە چوویە.
بەرەڤان حەمدی، بریكارێ وەزارەتا شەهید وئەنفالكریان ل هەرێما كوردستانێ بۆ (باسنیوز) دیار كر كو: "ئەڤ كار هاتیە كرن ژی ل نێزیك دێ ئەنجام هەبن بتایبەتی ژی كارێ ل سەر گۆرێن بكۆم هاتیە كرن ئەو روفاتێن ژناڤ گۆرێن ب كۆم هاتینە دەرخستن. دووڤ سەمپلێن هاتینە وەرگرتن ئەنجامێن باش هەبووینە بۆ بەلگەنامە كرنێ پێخەمەت جینۆسایدێ. هەتا نۆكە 16 گۆرێن ب كۆم هاتینە ڤەكرن ل گوندێ كۆچۆ. 234 روفات هاتبوونە دەرخستن و پشكنین بۆ هەموویان یا هاتیە ئەنجامدان و كار یێ بەردەوامە و نموونەیێن خوینێ ژ كەس و كارێن قوربانیان یێن هاتینە وەرگرتن و پرۆسەیا وەكهەڤیا دووماهی مایە ونها كار لسەر یێ بەردەوامە. دێ هێشتا سەمپلێن خوینێ هێنە وەرگرتن ژ كەس و كارێن قوربانیا بتایبەتی ژی یێن كەمپان هاتینە ئاكنجیكرن".
خویا ژی كر: "ئەم چاڤەرێ رەوشا عێراقێ و تەناهیا دەڤەرا شنگال دكەین كو تیمێن مە وەكو هەرێما كوردستانێ یێن ئامادەنە بۆ پروسەیا داهاتی و پلان یا هەیە. ئەز هزر دكەم ئەو پلانا دێ كەڤتە سالا 2020ێ دا".
