كه‌س ب قاتى و كورسیكێ گوهۆرینان ناكه‌ت!
2019-11-30 00:00:00 - سەرچاوە: ئه‌ڤرۆ نيوز
كه‌وسه‌ر شه‌وكه‌ت چه‌ند خۆله‌كه‌ك مابوون بۆ ده‌مژمێر هه‌شت ده‌ما گه‌هشتیمه وێ قوتابخانێ، پشتى ده‌مه‌كى روونشتیم، دبیت نیڤ ده‌مژمێر بۆرى، من هه‌ست پێكر یا تۆڕه‌دبم، هه‌رچه‌ند چاڤه‌رێبوون و گیرۆبوونا رێڤه‌به‌را نه‌ریته‌كێ وه‌لاتى یه! لێ دسه‌ر هندێرا هێش من نه‌شیایه خوه رازیكه‌م و هێش ب چاڤه‌رێبوونێ تۆڕه‌دبم! ب نه‌چارى ل مامۆستایه‌كێ زڤریم و پرسیار كر: رێڤه‌به‌ر ناهێت؟ هه‌مى جاران دێم و ڕوخسارێ ڕێڤه‌به‌ران د هزرامن دا كه‌سه‌كێ تۆڕه و ب ته‌مه‌ن و نه‌فس مه‌زن و خودانێ قاته‌كێ و ریباتێ یه ل پشت مێزه‌كێ ب هه‌رى تشتى ڤه مژووله، كارێ وى بخوه تێنه‌بیت! هه‌لبه‌ت ل وى جهى هێش من چ كه‌سێن ب ڤى ساخله‌تى نه‌دیتنه! لێ خانما مامۆستا گۆت: رێڤه‌به‌ر ژمێژه یێ هاتى!، بۆ من بخوه گه‌له‌ك یا سه‌یربوو ڕێڤه‌به‌ر گه‌نجه‌ك بیت ب قه‌میسه‌كى و په‌نترۆنى ل واران بهێت بچیت، د راستى دا ئێكه‌م جاربوو من دیتى رێڤه‌به‌ره‌ك نه ل پشت مێزه‌كێ و چار په‌یڤ و ئیمزایه‌كا خوه بكه‌ته منه‌ته‌ك، به‌لكى زه‌لامه‌كێ گه‌نج ل ناڤ قوتابیان بهێت و بچیت و جهێ خوه گه‌له‌ك ب ساده وه‌رگریت و ببینیت ئه‌رك. دبیت گه‌له‌كێن دى وه‌كى من هه‌بن و دێمێ رێڤه‌به‌را ب كه‌سه‌ك بته‌مه‌ن و تۆڕه و نه‌فس مه‌زن ته‌خمین دكه‌ن، ئه‌ڤه بخوه ژى جۆره‌كێ سیاسه‌تێ یه و ب پیلان مێشك و هزرێن مه ل سه‌ر هنده كاران فێركرینه، هه‌ر كه‌سێ پۆسته‌ك وه‌رگریت دڤێت قاته‌كێ بكه‌ته به‌رخوه و ل سه‌ر كورسیه‌كێ روونیت و ئێدى كه‌سێ ماف نینه گۆتنه‌كێ د به‌ریا وى را بێژیت، ئه‌ڤه تێرا هندێ دكه‌ت چینایه‌تى دروست بیت. ئه‌م بخوه ژى فێرنه‌بووینه بلندیا پله پۆستا په‌یوه‌ندیا ب زێده‌هیا به‌پرساتیێ و زێده‌بوونا كارى یاهه‌ى, به‌لكى د هزرا مه دا چه‌ند پۆست مه‌زنتربیت، نه‌فس دێ هندى بلندتر بیت و ئه‌رك ژى دێ كێمتربیت، دزى و گه‌نده‌لى ژى مژاره‌كا دى یه! ده‌ما دیتنا دیمه‌نێ رێڤه‌به‌ره‌كێ ب قه‌میس و په‌نترۆنى و ل ناڤ قوتابیان بوو مه‌ببیت دیمه‌نه‌كێ نه مه‌عقوول و دزى و گه‌نده‌لیا رێڤه‌به‌رى و به‌رپرسی یا مه‌عقوول بیت! ئێدى گرنگه بپرسی هه‌رماندنا سیاسه‌تێ ئه‌م به‌ر ب كیش ئاقارى ڤه برینه؟ ده‌ما دبیته سرا ل سه‌ر گرتنا وێنه‌كى ل گه‌ل گه‌نجه‌كێ ل ته‌مه‌نێ وان هه‌مى گه‌نجێن كریه سرا گرتنا وێنه‌ى، لێ ب تنێ جوداهیا د ناڤبه‌را وان دا چینایه‌تى یه وى ده‌مى گرنگه ژ خوه ب پرسی سیاسه‌تێ تو به‌ر ب كیش رادێ به‌ندایه‌تیێ ڤه بریه؟ ده‌مێ نه‌یا مه‌عقوول بیت كورێ سه‌رۆكى و كوڕێ وه‌زیرى و كورێ به‌رپرسى ل خواندگه‌ها سه‌رێ كولانێ بخوینن! ده‌مێ یا به‌رعاقل نه‌بیت هه‌ڤژینا سه‌رۆكى ل نه‌خۆشخانا تاخى زارۆ ببیت؟ جهێ حێبه‌تیێ بیت پارێزگار و وه‌زیر ب پاسێ بچنه جهێ كارێ خوه! ئێدى گرنگه ب پرسین سیاسه‌تێ ب چ مه‌ره‌م هزرێن مه مراندینه؟! ئه‌و فۆرێمن ئه‌م پێهاتین مژوولكرن، پێدڤیه ب شكاندنێ نه، رێڤه‌به‌ر ب كورسیكێ و قاتێ گوهۆرینانان ناكه‌ن، به‌رپرس ب دره‌وا و گه‌ندلیێ گوهۆرینان ناكه‌ن، چاڤێن مه ژى داخوازا دێمێ جوان دكه‌ن، ئه‌م ژى دخوازین دێم و روخسارێن به‌رپرس و رێڤه‌به‌ران ژ كه‌سێن نه‌فس مه‌زن و ناڤچاڤگرێ و دزیكه‌ر توند بده‌ركه‌ڤن.
