دادگای باڵای نێونەتەوەیی فەرمانی ڕاگرتنی بەرنامەی ئەشکەنجە بە سوریا دەدات
2023-11-16 20:06:08 - سەرچاوە: دەنگی ئەمەریکا
دادگای باڵای نەتەوە یەکگرتووەکان ڕۆژی پێنجشەممە بڕیاریدا سوریا دەبێت بەرنامەی ئەشکەنجەدانی خۆی ڕابگرێت کە لێکۆڵەران دەڵێن دەیان هەزار کەسی کوشتووە، ئەمەش لە یەکەم دۆسێی نێودەوڵەتیدا لەسەر شەڕی ناوخۆی ئەو وڵاتە کە لە ساڵی 2011 دەستیپێکردووە. دادگای دادی نێودەوڵەتی ڕایگەیاندووە، پێویستە سوریا "هەموو ڕێوشوێنێک لە چوارچێوەی دەسەڵاتی خۆیدا بگرێتەبەر بۆ ڕێگریکردن لە کردەوەی ئەشکەنجەدان و کرداری تری دڕندانە، نامرۆڤانە یان سوکایەتی پێکرد وەک سزادان ". هەروەها دادگا بڕیاریدا کە سوریا دەبێت "ڕێگری لە لەناوچوونەکان بکات و دڵنیابێت لە پاراستنی هەر بەڵگەیەک" کە پەیوەندی بە ئەشکەنجەدانەوە هەبێت. کەنەدا و هۆڵەندا داوایان لە دادگای نێودەوڵەتی تاوانەکان کردبوو کە "بەپەلە" فەرمانی ڕاگرتنی ئەشکەنجەدان لە زیندانەکانی سوریا بدات، بەو پێیەی "هەموو ڕۆژێک دەژمێردرێت" بۆ ئەوانەی کە هێشتا دەستبەسەرن. ئەم بڕیارە دوای ئەوە دێت کە فەرەنسا فەرمانی دەستگیرکردنی نێودەوڵەتی بۆ بەشار ئەسەد سەرۆکی سوریا دەرکرد، کە لە ساڵی 2013دا بە هاوبەشی لە تاوانەکانی دژ بە مرۆڤایەتی لەسەر هێرشە کیمیاییەکان تۆمەتبارکرابوو. لە مانگی دەدا دادوەرەکانی دادگای نێودەوڵەتی لە لاهای گوێیان لە گەواهییەکانی دەستگیرکراوەکانی سوریا بوو کە باسیان لە دەستدرێژی بە کۆمەڵ و بڕینی بەشەکانی جەستە و سزا جۆراوجۆرە دڕندانەکانی تر کرد. داوا لە دادگا کرا "ڕێوشوێنی کاتی" بۆ ڕاگرتنی ئەشکەنجە و دەستبەسەرکردنی هەڕەمەکی لە سوریا بگرێتە بەر و زیندانەکان بە ڕووی پشکنەرانی دەرەوە بکرێنەوە و زانیاری بە خێزانەکان سەبارەت بە چارەنووسی ئازیزانیان بدرێت. کەنەدا و هۆڵەندا لە داواکارییەکەیاندا بۆ دادگای نێودەوڵەتی تاوانەکان نووسیویانە ئەشکەنجەدان لە سوریا "بەربڵاوە و چەسپاوە... و تا ئەمڕۆش بەردەوامە." هەردوو وڵات بە پشتبەستن بە ڕاپۆرتێکی ئەنجومەنی مافی مرۆڤی نەتەوە یەکگرتووەکان دەشڵێن "دەیان هەزار کەس لە ئەنجامی ئەشکەنجەدان گیانیان لەدەستداوە یان بێسەروشوێنن و بە مردوو دانراون. سەرچاوە: فرانس پرێس
