عەمید ئیدریس: دۆخی ئەمنیی كەركووك لەوپەڕی خراپیدایە
كەركووك-KDP.info- بەڕێوەبەری ئاسایشی كەركووك دەڵێ، داعش لە سنووری كەركووك دەستی بە جموجۆڵ و كردەی تیرۆریستی كردووە و بەردەوام لە پەرەسەندندایە، بۆیە ئەگەر وا بڕوات كردەی تیرۆریستییان زۆر زیاتر دەبێت، چونكە دۆخی كەركووك لەوپەڕی خراپیدایە.
عەمید ئیدریس ڕەفعەت، بۆ ماڵپەڕی فەرمیی پارتی دیموكراتی كوردستان گوتی: "دۆخی ئەمنیی كەركووك لەوپەڕی خراپیدایە و چالاكی و كردەكانی داعش لە پەرەسەندندان و دەیانەوێت زۆرترین كردەی تیرۆریستی ئەنجام بدەن، بەردەوامیش تەقینەوە دەكەن و ماوەیەكیشە جموجۆڵیان زۆر زیاد بووە".
ڕەفعەت گوتیشی: "جموجۆڵی داعش زیاتر لە قەزا و ناحیەكان هەیە و بەردەوام كردەی تیرۆریستی ئەنجام دەدەن، بۆیە دۆخی ئەمنیی كەركووك بەردەوام بەرەو خراپی دەچێت".
ناوبراو باسی لەوەش كرد: "هۆكاری تێكچوونی دۆخی ئەمنیی كەركووك، بۆ ئەوە دەگەڕێتەوە كە پێشمەرگە و هێزە ئەمنییەکانی كورد لەوێ نەماون و خەڵكیش پێشتر هاوكاری ئێمە بوون، بەڵام ئێستا هاوكار نین و دەسەڵاتی ناوچەكەش توانای نییە، چونكە پێشتر پێشمەرگە هێڵی بەرگریی دانابوو، بەڵام ئێستا ئەوە نەماوە و تیرۆریستانیش دەرفەتی زیاتریان بۆ ڕەخساوە".
دەشڵێ: "ئەگەر بەو شێوەیە بەردەوام بێت، دوور نییە داعش پێداچوونەوە بە چالاكیی خۆیاندا بكەن و زیاتری بكەن، چونكە ڕۆژ بە ڕۆژ كردەكانیان لە زیادبووندان".
بڵند ئیبراهیم
