هۊچگه له سه‌ر شوون خوه‌ێ نییه
جه‌لیل ئاهه‌نگه‌رنژاد / گڵاڵ پڕ له زیقاوێگ وه هۊر بارن گ بڕێگ له مه‌ردم له ناوێ گیژ ئڵاڵن و هاوارێان وه هۊچ گووشێگ له‌و بانه‌و نیه‌ڕسه‌ێ. ئه‌مانێگ هه‌یتاهه‌یت که‌س یا که‌سانێگ توان بێه‌نه گژ که‌نا و بچنه‌و بان. ئه‌وانه گ ده‌سێیان وه که‌ن و کن کوو ئڕاێ ئه‌و بان چێن نیه‌ڕه‌سێ، ته‌نیا وه یه نووڕن گ هه‌ر که چێیه‌و بان، وه هه‌ر چنگڵه‌پرچیێگ بۊیه، خوه‌ێان بڕه‌سننه پێا و بکیشنه‌ێه‌و خوار. دی عه‌قڵێان نیه‌ڕه‌سێ گ بۊشن شاهات یه چێیه‌و بان و هاوارێگ کرد ئڕاێ یه گ گشتێ له‌ێ زیقاو بێ‌ده‌ره‌تانه دران.
ئێ مه‌سڵه‌ته، حاڵ ئمڕوێن ئیمه کرماشانییه‌یله. ئه‌ڵبه‌ت فره ساڵه وه‌ێ گیچه‌ڵه دچاریم. ئڕاێ شییه‌و کردن باس خاسه وه چه‌ن مدوو ئاماژه بکه‌م. وه عنوان که‌سێ گ فره‌تر له سی ساڵه هامه ناو کار ڕووژنامه‌وانی و وه قوه‌ڵێگ ڕسانه!، له هه‌ر به‌شێگ هۊرده‌و بۊمه، نموونه‌یل فره‌ێگ له ئێ سه‌رهاته دیمه.
به‌رپرس ، هه‌رسه‌ێ له چه‌و ئیمه‌وه‌و به‌رپرسه و هاتێه تا کاره‌یل فره‌ێگ بوه‌ێده‌و په‌رتق، ئه‌مانێگ له بنه‌چه‌ک، له چه‌و بانێنه‌گان، ماموورێگه ئڕاێ یه‌ێ‌ده‌س کردن و بێ ده‌نگ کردن و گاهه‌یش سه‌رکوت کردن ئه‌وانه گ ماف خوه‌ێان له‌ێ کارمه‌زرنه‌یله توان.
له دنیایل کولتووری، کومه‌ڵاێه‌تی، عابووری و ڕامێاری ئێ گیچه‌ڵه له وینه‌ێ شێرپه‌نچه، په‌نجه کوتاسه تمام ڕه‌گ و ڕیشێمان. پرسێار گرینگ یه‌سه: ئڕا له‌ێوا وه پیمان هاتێیه؟! وه ئعتقاد من له چه‌ن ده‌روه‌چه‌و باه‌ێه‌س وه‌ێ گه‌په بنوڕیم.
ده‌روه‌چ ئه‌وه‌ڵ: هه‌ر گیچه‌ڵێگ ئڕاێ ئاێه‌مه‌ێل ئه‌ڵکه‌فێ، ئه‌گه‌ر خاس هۊرده‌و بوود، دۊنێ شوون پا چرکنه‌گه‌ێ خوه‌ێ ها له ناوێ و ده‌س ئه‌وه‌ڵ ک وه‌شیاێه، خوه‌ێ داسه خوه‌ێ!. فه‌رهه‌نگ ناشیرن په‌ێوه‌ندی گرتنمان له بنه‌واێا ئاڵشتییه!. له‌وا چاشیایمنه ک ئه‌گه‌ر «غه‌ێره» له کوومه‌ڵگا گیر گیچه‌ڵێگ هاتێه، وه ئیمه چوه!؟ ئه‌گه‌ر ده‌سمیه‌ت تواێ، وه ئیمه چوه؟! ئیمه خوه‌شمان تێ سه‌ر وه له‌ش هاوساوا نه‌ود. هاوده‌نگ نییمن!.
له شوون یه نییمن ک بزانیمن مدوو ئێ گیچه‌ڵه‌یله چوه‌س؟ ته‌نیا له ناو زیقاو زنیانی خوه‌مان ژاو ئڵاڵیم و قردگی نواتره‌ک نیه‌پایمن. ئه‌گه‌ریش ئه‌ڵکه‌فت، چیمنه گژ یه‌کا. وه زوان پیه‌ن کوردی خوه‌مان: ئڕای زنیانی له ناو کوومه‌ڵگا گورجه‌و نه‌ۊمنه. یه‌کێگ له ئه‌وه‌ڵ‌قانوونه‌یل کوومه‌ڵگا له شوون ماف گردینه. چشتێ گ ئیمه فره ساڵه له هۊره‌و بردیمنه‌سه‌ێ. چ حه‌قه‌یلێگ ک وه نه‌حه‌ق نه‌ۊنه و ئیمه ته‌نیا وه پێیان نووڕسیمنه!…
ده‌روه‌چ دو: ماف و حه‌ق خوه‌مان نیه‌ناسیمن. له ناو کوومه‌ڵگا هه‌ر مروڤێگ حه‌ق خوه‌ێ دێرێ. هه‌ناێ حه‌ق خوه‌مان نه‌ناسیمن، نیه‌تۊیه‌نیم هووشمان وه پێیه‌و بوود. یه‌سه ک گیچه‌ل گه‌وراێ له هۊره‌و بردن«متاڵبه‌گه‌ری» تێده سه‌رساتمان و هه‌ر به‌رپرس بێ کاره یا کاردارێگ، ئڕاێ خوه‌ێ هه‌ر جوورێ گ تواێ ڕووژگار به‌ێده‌و سه‌ر و ده‌س ئیمه هه‌ر ساڵ خالی‌تره‌که و نیشیمنه‌و ئه‌وه‌ڵ‌سه‌نده‌لی بێکاری و فه‌ڵاکه‌ت.
ده‌روه‌چ سێ: هه‌ناێ مه‌ردم وه‌ێ چۊنه گیچه‌ڵه‌یلێگ گرفتار بۊن، به‌رپرسه‌یل وه ڕه‌حه‌ت ئه‌وڵێانا «هشارهشاره‌کی» که‌ن!. جه‌رخه وه جه‌رخه نه‌نه‌ێانه زگ یه‌ک. سیاسی چووده گژ یاسییا، تێکووشه‌ر کولتووری و عابووری و کومه‌ڵاێه‌تییش هه‌ر ئێ چۊنه!…
هه‌ناێ وه‌ێ چۊنه وه پیمان هات، شار و دیارمان پڕ بوود له سیاسه‌تباز ئاێه‌م فرووش، ڕخنه‌گه‌ر دڵاڵ، شاێر ده‌رباری، به‌رپرس ڕشپه‌تخوه‌ر، ڕووژنامه‌نۊس 5قورووشی و هه‌ر ئێ چۊنه بچنه‌و نوا و شماره بکه‌ن!…
ده‌روه‌چ ئاخر: له‌ێ پاریزگا یا ئوستانه هۊچگه له سه‌ر شوون خوه‌ێ نییه. ئه‌گه‌ر وه‌ێ چۊنه بچیمنه نوا، گیچه‌ڵه‌یلمان ڕووژ وه رووژ فره‌تره‌ک بنج ڕیشمان گرن. سه تا وه‌ختێگ هه‌س، هه‌ڵسیمن و له شوونه ئه‌سڵه‌گه‌ێ خوه‌مان بگه‌ردیمن. جی خوه‌مان بۊنیمنه‌و و له شوون خوه‌مان، له شوون ماف خوه‌مان! بگه‌ردیمن. ئه‌وانه گ زۊتره‌ک توان ئڕاێ ئابادی ئێ ناوچه له‌ێ زیقاوه ده‌رچن، بێه‌یمه قولێانا و پاڵپشتیێان بیه‌من. ونه کرماشان ئڕاێ ساڵێار تره‌ک بووده ده‌یشته‌ێ بێ ئاوێگ له هه‌ژاری و بێ که‌سی و دژاێه‌تی و ناوێ له ناو ناوه‌یل که‌فێ. ئا دێر نه‌ۊیه، هه‌ڵسیمن و کارێگ بکه‌یم!
