هەواڵی کوردستان ئێستا

کەنعان موڕاد/ لە خود سۆشیال میدیا وتن: سۆشیال میدیا ئی جەهانە کەێدە ئاواییگ بویچگ، هەڵبەت نەگ ئاواییگ هەکاتی ئاوایەیل ئیمە، یا ئەو ئاوایەیلە کە باوگ و باپیرمان لەناویان بوینە، کە ٢٥ تا ٣٠ ماڵ خەرگین بوینە، پشت نانەسە پشت یەکتر، و هەر ماڵیگ روی لە شوینیگ کردیە، هەکاتی خەفتن قازەیل، پشتیان وەیەکەو قایم کەن، و هەر قازیگ روی کەێدە شوینیگ وەچواردەورەو، و یەکیگیش لە قازەیل وەپاوە وسێد، تا وە ئارامی بخەفن، و ئەگەر دوژمن لە شوینەگەو باێد، کەفێدە روی یەکیگیان، و لە پشتەو پەلامار نیەێد.

هەر وەو جویرە، ئەوسا ماڵەیل ئەو ئاوایلەیلە دروس کردیان، تا دوژمنەیل لە پشتەو پەلامار ماڵیگ لە ئاوایەگە نەیەن، ئیجا شکست گەورەیگ وەپیان بارن.

وەلێ ئەگەر بنووڕیمنە سۆشیال میدیا، کە خوازێد ئی جەهانە لەناو یەک ئاوای بویچگ گردەو بکەێد، و هەڵبەت فرەیگ لە مەردم جەهان هانە ناوی، ئی پرسیارە بکەیمن، کە ئایا پشت مەردم کردەو یەک، تا مەردمەگە روییان کەفتە روی یەکتر، و پشتیان وە چووڵی مەنیە، و هاتێ لە زویەو پەلامار دریانە، لە دوژمنیگ نادیار؟.

پەروەردەی مناڵەیل ئاوای، هەمیشە جیوازییگ لە پەروەردەی ناو شار دیرێد، چوینکە مەردم ئاوای کەمە، و گشتیان ناسیارن، ئەراوە مناڵەگە قمشی نیەکەێد کار و رەفتار بەدیگ بکەێد، چوینکە وەزوی ئاشکرا و رسوا بوود، و وەزوی دەنگ کار و کردەوەی رەسێدە ماڵ خوەیان، و باوانییش لەلی ئاگادار بوون، و هەمیشە رخی لەوە چوود، و هەمیشە قسە و رەفتار خوەی پەسەن کەێد، و تا گەورە بوود، رەوشت و رەفتاری وەشیوەی خاسیگ مینێد.

لێرا، هەمیش سۆشیال میدیا ئەو ئاوای بویچگە دروس نەکرد کە کەسیگ لە پشت شاشەی مۆبایل، شەرم لە خوەی بکەێد، ورخی لە رسوایی بچوود.

دیارە لە سۆسیال میدیا، رسوابوین بویەسە ئامانج بەشیگ لە دانیشتگەیل ئی (ئاوای) ئەڵاجویە، کە وە کارەیلیگ بی رەوشت و بی ئەغمازی ناویگ ئەرا خوەیان دەرکەن، و مەردم فرەیگیش چەپڵەی گەرمیگ ئەرایان کوتن، یە کەی ئاوایە؟.

و دیارە لە (ئاوای) سۆشیال میدیا، یەی دەمچەرچگیگ نییە، تا بویشێد یە خاسە و یە گەنە، و مەردم لەلی یای بگرن، کە سۆشیال میدیا (ئاوای) هەرکەڕاخوەیە!.