كه‌لار دوياى به‌تاڵبوينى له كۆرۆنا جموجويل بازرگانى له‌تى زينگه‌و بوێ
شه‌فه‌ق نيوز/ ئداره‌ى قه‌زاى كه‌لار له گه‌رميان، جه‌خت له زينگبوينه‌وه‌ى هه‌ڵكه‌فت بازرگانى كرد دوياى به‌تاڵبوين قه‌زاگه له تويشبوين وه ڤايرۆس كۆرۆنا.
له‌وباوه‌ته‌و، شه‌هاب حاجى ئه‌حمه‌د قايمقام قه‌زاگه ئه‌را شه‌فه‌ق نيوز وت: ناوچه‌يل كه‌لار به‌تاڵه له تويشبوين وه كۆرۆنا و ته‌نيا 300 حاڵه‌ت گومانكرياێ تۆمار كرديمنه و ئه‌نجامه‌يليان نيگه‌تيف بويه‌و ئيسه‌يش مه‌ردم قه‌زاگه پابه‌ندن وه رێ وشوونه‌يل قه‌يه‌غه‌ى نيمچه‌يى و پلانه‌يل سه‌لامه‌تى و ته‌ندروستى له‌وه‌ختيگه‌و كۆرۆنا په‌يا بويه تائيسه.
جى باسه، ئه‌حمه‌د باس له‌وه‌يش كرد هه‌ڵگرتن قه‌يه‌غه يا هه‌ر بڕيايگ له‌ى باوه‌ته‌و كه‌فته‌سه لاى حكومه‌ت هه‌رێم و شانه‌ى قه‌يران و ناوخۆيى كوردستان و باسيش له سه‌ركه‌فتن پلانه‌يل خوه‌يپاريزى و هاوكارى هاووڵاتيه‌يل كرد وه‌ل ده‌زگايه‌يل ئه‌منى و ته‌ندروستى و ئاماژه وه‌يه‌يش كرد چالاكى بازرگانى له قه‌زاى كه‌لار وه‌ل دياله‌و به‌غدا و ناوچه‌يل ده‌ورگرد دوباره زينگه‌و بويه.