هەواڵی کوردستان ئێستا

 کوڵە چیرووک

دویەت رەنگینیگ وەناو (سۆفی) و کوڕیگ شیوەکار وەناو (پاتریک) لەناو شاریگ بویچگ لە فەرەنسا بوین.

پاتریک توانای گەورەیگ داشت لە وینەکیشان، کە مەردم دەوری وتیان بانان رووشنیگ دیرێد، و تەمەیی کردن پچوودە پاریس.

پاتریک هەناێ تەمەنی رەسیە بیس ساڵان، سۆفی خوازی، و یەکەو بان گردنە وەر، و وەرەو پاریس، پایتەخت رووشنایی، کە تەکبیر داشتن پاتریک بوودە وینەکیش مەزنیگ، و سۆفی بوودە نویسەریگ ناودیار.

 لە پاریس، ماڵ رەنگینیگ گردنە کرا، و دەسکردنە هەوڵ و تەقەلا، تا لەناو ئەو شارە سۆفی ژنیگ دەوڵەمەن و رویخوەش ناسی.

سۆفی و ئەو ژن دەوڵەمەنە خی دانەویەک، و رووژیگ سۆفی خوازێد بچوود ئەرا میلکان خوەی، تا لە ئاهەنگ سویر یەکیگ لە کەسوکارەیلی ئامادە بوود، و داوای ملوانکیگ مرواری لە ژنەگە کرد، تا کەشخە وەپی بکەێد لەناو سویرەگە، و ژنەگەیش ملوانکەگەی دادە سۆفی، وەلێ تەمەیی کرد تا مقەیتی ئی ملوانکە بکەێد.

سۆفی ملوانک مرواری کردە گردن، و هەناێ لە ئاهەنگ سویرەگە گلەو خوارد، نووڕی کە ملوانکەگە گوم بویە، و دەسکردە گیریە، و پاتریکیش دادە مل سەرا، ئەرا ئی کەلەمە کە وەسەریان هات.

ئی دوو بەدبەختە، ناچار بوین بچنە مینەی ملوانکیگ هەکاتی ملوانک مرواری ژنەگە، تا ئەرای بسینن، لە جیای هن خوەی.

ژن و شوی، دار و نەدار خوەیان فرووشتن، و بڕیگ پویلیش قەرز کردن، و خاوەن پویلیش بڕیگ زیاتر لەبان پویلەگەی لەلیان تواێد، تا بچن ملوانکیگ بسینن لەجیای ئەوە کە گوما بویە.

سۆفی و پاتریک وە سەر چەمیاگ، ملوانکیگ ئەرا ژنەگە هاوردن، ژنیش هەر نەزانست یە هنەگەی خوەی نییە.

رووژ هات و رووژ چگ، و سۆفی و پاتریک هەر کار کەن و قەرز مەردم گلەو دەن، وەلێ قەرزیش هەر زیایەو بوود، تا ناچار بوین لەو ماڵە دەربچن، و ماڵیگ ئەرزانتر ئەرا خوەیان پەیا بکەن، و سۆفی واز لە کار خوەی هاورد، و ناچار بوی بوودە نەوکەر لەناو ماڵەیل، و پاتریکیش واز لە شیوەکاری هاورد، و چگە ناو بەندەر، بار وە کووڵ هەڵگرد.

 تا ٢٥ ساڵ یە هاڵ ئەو ژن وشوی بیچارە بوی، خەو و ئومیدیان فەوتیا، و تەمای هویچیان نەمەن.

رووژیگ سۆفی چگ ئەرا دوکانیگ تا سوزە ئەرا ئەو خاوەن ماڵە بسینێد کە لەلای کار کەێد، و چەوی کەفتە ژنە دەوڵەمەنەگەی جارانی، خاوەن ملوانک مرواری، ژنیش لەلی پرسی

 تو فڵانی؟

 وت: ئا یە خوەمم

وت؛ یە چە وەسەرد هاتیە؟، ئەڕا وەیجویرە شیوەد شڕەو بویە؟، و ئەرا وەناکاوەو نەمەنین؟

سۆفی وت: لە یاددە ئەو ملوانکە کە ئەرا سویر لەلید بردم؟، لەلیم گوم بوی، و ناچار بویمن خوەمان بخەیمنە ژیر قەرز گەورەیگ، تا ملوانکیگ هەکاتی ئەوە ئەراد گلەو بەیمن، و لەو رووژەو هاڵمان شڕە، و هیمان قەرز دەیمنەو.

 ژنەگە واقی پەڕی، و وت: ئەی بەدبەختی، ئەڕا قسە نەکردی، ئەوە ملوانکیگ مرواری راسی نەوی، تەنیا میرگ فرە ئەرزان بوی!.

ئەڵگەردان: ئاژانس شەفەق نیوز