وەزیری تەندروستی ئیسرائیل سورە لەسەر دەست لەکار کێشانەوە
هەولێر-KDP.info- وەزیری تەندروستی ئیسرائیل سوربوونی خۆی ڕادەگەیەنێت بۆ دەست لەکارکێشانەوە لە پۆستەکەی پاش ئەو ناڕەزایی و بێزاریەی گەلی ئیسرائیل هەیەتی لە بەرامبەر چۆنیەتی سەروسەوداکردنی لەگەڵ پەتای کۆرۆنادا.
یاکۆڤ لیتزمان، وەزیری تەندروستی ئیسرائیل، سەرۆک وەزیری وڵاتەکەی ئاگادار کردۆتەوە، لەگەڵ پێکهێنانی حکومەتی نوێدا دەستبەرداری پۆستەکەی دەبێت.
لەو ئاگادارکردنەوەیەدا وەزیری تەندروستی ئیسرائیل هیچ ئاماژەیەکی بەو ڕەخنە و ناڕەزاییە زۆرانە نەکردووە کە ڕووبەڕووی وەزارەتەکەی کراونەتەوە، بەڵام وتوویەتی پۆستی وەزارەتی نیشتەجێکردن وەردەگرێت لە حکومەتی نوێی وڵاتەکەدا.
لیتزمان، 10 ساڵە وەزیری تەندروستی ئیسرائیلە و لە ڕاگەیاندنەکەیدا نووسیویەتی "بڕیارم داوە نەگەڕێمەوە بۆ وەزارەتی تەندروستی بۆ چوارەم جار، بەڵکو پێم باشترە ڕێبەرایەتی پەرەپێدانێکی بەرفراوان و چارەسەرکردنی قەیرانی نیشتەجێبوون بکەم لە ئیسرائیلدا لە ڕێی وەزارەتی نیشتەجێکردنەوە."
بەگشتی حکومەتی ئیسرائیل ڕووبەڕووی ڕەخنەیەکی زۆر بۆتەوە بەهۆی شێوازی سەروسەوداکردنی لەگەڵ پەتای کۆرۆنادا.
