هەواڵی کوردستان ئێستا

شەفەق نیوز/ سەرچەوەیگ ئەمنی لە نەجەف، ئمڕوو جمعە، هویردەکاری نوویگ لەباوت دکتۆر فەیسەڵ حوێزی ئاشکرا کرد کە وەرد زیاتر لە هەفتەیگ کوشیا، و دیاری کرد کە ئەو گەنجینەی پویلە کە لە ماڵ قوربانیەگە دوست شوینی نەما، و دەرکەفت کە ئەندامی ئەمنی و دوو کەس ترەک دەسیان هاناو تاوانەگە.

   

لە 3ی ئایار، سەرچەوەیگ ئەمنی ئەرا ئاژانس شەفەق نیوز وت: هیزیگ ئەمنی تەرم پزشک دگان خانەنشین فەیسەڵ حوێزی لەناو ماڵەگەی وە کوشیای پەیا کرد، کە دەس و پایلی یەسیاوێد و گولە لە سەری دریاس.

سەرچەوەگە دیاری کرد کە هیزەیل ئەمنی ئاشکرا کردن کە چشتەیل ناو ماڵ قوربانیەگە دزیانە وبی ئاشکراکردنیگ زیاتر.

سەرچەوەگە ئەرا ئاژانس شەفەق نیوز وت: دویای دەسگیرکردن گشت توومەتبارەیل وە کوشتن حوێزی، دەرکەفت کە ئەرا دزیکردن ئی تاوانە کریاس، و بکوشەگە ئاشکرا کردگە کە پویلەگە دزیە و ئەرا شوینیگ ترەک بردیەسەی، وەلێ ئیرنگە کار نوویگ لەباوەت گەنجینەی پویلەگە دەرکەفت.

وت: بکوشەگە لە لێکۆڵینەوە وتیە؛ گەنحینەگە لەناو ماڵیگ نیمچە دروسکریای لە ناوچەی بەراکیە شاردیەسەو، وەلێ هەنلێ دەزگایل ئەمنی رەسینە شوینەگە گەنجینەگە دیاری نەویە، کە دیارە بکوشەگە دروو کردگە، یا کەسەیلیگ ترەک وەگەردی بوینە وناویان ناوردیە.

سەرچەوەگە دیاری کرد کە دووارە لێکۆڵینەوە واز کریا ئەرا رەسین وە بندروس راسیەگە، تا رەسینە ئەوە کە سێ کەس گومان لەبانیان هەس، یەکیگیان ئەندام ئەمنیە ماڵیان ها وەرانەور ئەو ماڵە کە گەنجینەی پویلەگە لەناوی شاریاسەو، و دووان ترەک خەڵک ناوچەگە کە ئاگادار دەزگایل ئەمنی کردنە.

وتیش؛ فەرمان دەسگیرکردن لەبان ئەو سێ کەسە دەرکریا، و ئەندامە ئەمنیەگە ئاشکرا کرد کە خوەی گەنجینەگە بردیە و چووڵی کردیە کە 12 ملیۆن و 719 هەزار  دینار و 600 دۆلار بویە وەگەرد کەمیگ تەڵا و کاغەز و بەڵگەنامەیل دکتۆرەگە.