هەواڵی کوردستان ئێستا

شەفەق نیوز/ سەرچەوەیگ ئەمنی لە پارێزگای دیالە، ئمڕوو سێشەممە، خەوەردا لە توومارکردن مردن سێ کەس وە چەن رویداویگ هاتوچو لە ناوچەیلیگ جیاجیا لە پارێزگاگە، و سەرچەوەیگ ترەک باس کوشیان دوو ئەندام سوپا و زەخمداری 4 ترەک وە رویداویگ هاتوچو لە پارێزگای بابل کرد.

سەرچەوەیگ ئەمنی لە پارێزگای دیالە ئەرا ئاژانس شەفەق نیوز وت: خوەنەواریگ ناوەندی دویای وەرگردن ئەنجامەیل تاقیکردنەوەیل مەوقەی رەدبوینی وەرەو ئەودیم جادە لەبان ری کەرکوک- بەغداد نزیک ناحیەی عزێم گیانی لەدەسدا.

 

سەرچەوەگە دیاری کرد کە مەوقەی رەدبوین کوڕەگە رویداویگ هاتوچو کەفتە ناوەین دوو ماشین رەیوەڕوی، کە خوەنەوارەگە وەگەرد ئەو ماشینەیلە تلیا، و یەکیگیش لە رانندەیل گیانی لەدەسدا.

 سەرچەوەگە وتیش: کابرایگ ئەندازیار ماشینەگەی لەدەسی دەرچگ و کەفتە ناو چەم خرێسان نزیک ناحیەی عەبارە و گیانی لەدەسدا.

 

وتیش: رویداویگ هاتوچو ناوەین دوو ماشین لەبان ری سولەیمانی - گوام لە قەزای مەنسووری خوەرهەڵات دیالە بویە هوکار زەخمداری دوو کەس.

 

سەرچەوەگەی پارێزگای بابل وت:  دوو ئەندام سوپا گیانیان لەدەسدان و چواریش زەخمدار بوین وە رویداویگ هاتوچو.

 

سەرچەوەگە ئەرا ئاژانس شەفەق نیوز وت: رویداویگ هاتوچو ناوەین دوو ماشین بویە هوکار کوشیان دوو ئەندام سوپا و زەخمداری چوار ترەک لە ناحیەی حەمزە.