د دوو هه‌یڤاندا زێده‌تر ژ 18 هزار په‌نابه‌ر گه‌هشتینه دهۆكێ
د ماوێ (2) هه‌یڤێن بورى دا دگه‌ل تێكچونا ره‌وشا ئێنماهیا رۆژئاڤایێ كوردستانێ وان هێرشێن بو سه‌ر وان ده‌ڤه‌ران ژلایێ سوپایێ تورکیا ڤه دهاتن ئه‌نجام دان ، تا نها زێده‌تر ژ (18) هزار په‌نابه‌رێن كوردێن رۆژئاڤایێ كوردستانێ گه‌هشتنه دهۆكێ
سالم سه‌عید، به‌رپرسێ پشكا په‌یوه‌ندى و راگه‌هاندنا بوردێ كارۆبارێن مرۆڤایه‌تى ل پارێزگه‌ها دهۆكێ د داخویانیه‌كێ دا بو (باسنیوز) دوپاتكر: "ژ وى ده‌مى هێرشێن سوپایێ توركیا بو سه‌ر رۆژئاڤایێ كوردستانێ دروست بوین هه‌ر ب زوو خه‌لكێ رۆژئاڤایێ كوردستانێ ژ پێخه‌مه‌ت پاراستنا گیانێ خو ب هه‌ر ره‌نگه‌كێ هه‌ى روو كره سنورێن هه‌رێما كوردستانێ و پارێزگه‌ها دهۆكێ هه‌ر بله‌ز ده‌رگه‌هێ خو بو وان په‌نابه‌ران ڤه‌كر و ب دلخوشى ڤه ده‌زگه‌هێ خێرخوازى یێ بارزانى ب هه‌مو روویه‌كێ ڤه ده‌ست ب دابینكرنا خزمه‌تگوزاریان كر بو وان په‌نابه‌ران و ژ هه‌مو رویه‌كێ ڤه خزمه‌تگوزارى بو په‌نابه‌ێن كوردێن رۆژئاڤا هاتنه دابینكرن".
گوت ژى: "د ده‌مێ (2) هه‌یڤێن بورى ژ هه‌یڤا 10/2019 تا هه‌یڤا نها یا 12/2019 زێده‌تر ژ (18) هزار په‌نابه‌رێن كوردێن رۆژئاڤایێ كوردستانێ ل سنورێ پارێزگه‌ها دهوكێ ل هه‌ردوو كه‌مپێن (گه‌ویلان و به‌رده‌ره‌ش) هاتنه ئاكنجیكرن و ڤه‌حه‌واند".
هه‌مان به‌رپرسى دوپاتى ل سه‌ر وێ چه‌ندێ ژى كر: "به‌رده‌وام هاریكاریێن مرۆڤى ژلایێ ده‌زگایێ خێرخوازى یێ بارزانى و رێكخراوێن بیانى دگه‌هنه به‌رده‌ستێ مه و بێ كه‌مته‌ر خه‌مى ل سه‌ر هه‌مو په‌نابه‌ران دهێن به‌لاڤ كرن و هییڤیخوازین بشێن ب هه‌مو رویه‌كێ ڤه د خزمه‌تا وان په‌نابه‌ران دا بین و بشێن خه‌مێن وان ب چه‌ند هاریكاریێن بچویك سڤك بكه‌ین".
