دەزگەهێ خێرخوازییێ بارزانی بوویە ناسنامەکە دن ژبۆ گەلێ کوردستانێ
رێبه‌ر عه‌بدوڵڵا
هەر د دەستپێکا دامەرزاندنا دەزگەهێ خێرخوازییێ بارزانی ل سالا 2005، کارێ وی دەزگەهێ ئەو بوو خزمەتا خەلکێ کوردستانێ ب تەڤایا ئول وپێکهاتەیان ب بێ جوداهی د 11 سێكته‌ران بکە، کو ئەو ژی لگۆر گۆتنەکە بارزانیێ نەمر کو ئەمر دکە و دبێژە شانازییە کو مروڤ خزمەتکارێ مللەتێ خوە بە. د هەر کریزەکێ دا دەزگەهێ خێرخوازییێ بارزانی خوە ب خودانێ تەڤ کریزێن مرۆڤایه‌تیێ زانییە، کو ئالیکاریێن خوە بگەهینە وان کەسێن کو هەوجەدارن، ئەڤ ل رێیا ڤەکرن و بەرفرەهـ کرنا ئۆفیسێن خوە ل تەڤایا باژار و باژارۆکێن هەرێما کوردستانێ و د نها ژی دا گەهاندنا ئالیکاری ب وەلاتێن دن، کو وەلاتی یێن وان هەوجەدارن، ئەڤە ژی وێ یەکێ خویا دکە، کو رێبازا پیرۆزا بارزانیێ نەمر بەردەوامە ل خزمەتکرنا مروڤایەتیێ ل تەڤایا جیهانێ.
دخوازم وێ یەکێ خویا بکەم کو دەزگەهێ خێرخوازییێ بارزانی د سالێن ده‌ربازبوویی دا و تەڤی هاتنا پێلا ئاوارە و کوچبەرێن کو بەر ب هەرێما کوردستانێ هاتی وەک کوردێن مە یێن رۆژئاڤایێ کوردستانێ ل سالا ۲٠۱۱و ئاوارەبوونا هژمارەکە زێدە یا عەرەبێن ناڤینا عێراقێ تەڤی هاتنا رێخستنا تەروریستی یا داعشێ ل سالا ۲٠۱٤، دەزگەهێ خێرخوازییێ بارزانی بوویە سەرڤگێرا تەڤ وان مالباتێن کو بێ جهـ و وار بوونە و تەڤ ئالیکاری ژی پێشکێشی وان هەوجەداران کرن، ڤیجا نە تەنێ ژبۆ ئاوارە و کوچبەران، لێ بەلێ ژبۆ وان کەسان ژی یێ دناڤا هەرێما کوردستانێ هەوجەدارن وەکە کریزین لەهییا و هەوجەدارێن تایبەت و مالباتێن سەر بلندێن شەهیدان و ئەنفالکرییان و زارۆکێن بێ سەمیان کو بناڤێ ( پرۆژەیێ ئازیزان ) دهاته ناسین و دابینكرنا ته‌ڤایا وان هه‌وجه‌داریێن كو خه‌لكێ كێم ده‌رامه‌ت یێ كوردستانێ ڤیچا چ نه‌خوه‌شی به یان ژی هه‌وجه‌داریێن دن به.
ژئالییەکێ دن ژی دەما کو رێخستنا تەروریستی یا داعشێ ئێرش ژبۆ سەر ئاخا پیروزا کوردستانێ دەستپێکری دەزگەهێ خێرخوازییێ بارزانی بەردەوام وەک ئەرکەکێ نیشتمانی ئالیکاری دگەهاندنە هێزێن پێشمەرگەیێ کوردستانێ.
هەروەها د سالا ۲٠۱۹ل دەما دەستپێکرنا خوەنیشاندانێن خەلکێ عێراقێ ژبۆ دەستخستنا مافێن خوە یێن رەوا وەکە خزمەتگوزاریێن دەستپێکی، هژمارەکە زێدە ب سەدەما وان خوەنیشاندانان جانێ خوە ژ دەست دا و ل سەر راسپاردەیا سەرۆک بارزانی، دەزگەهێ خێرخوازییێ بارزانی ئالیکارییا ماددی و مەعنەوی پێشکێشێ مالباتێن وان کەسان کر و هەروەها ئالیکاریێن خوە گەهاندن خەلکێ هەوجەدار یێ وەلاتی بورما و چەندین جهێن دن ژی.
د نها ژی دا دەزگەهێ خێرخوازییێ بارزانی، کو ڤایرۆسا کۆرۆنایێ بەلاڤ بوویە، وەک هەرگاڤ بەردەوامە ل ئالیکاریێن خوە ژبو وان کەسێن کێم دەرامەت و كو ب سەدەما قەدەغەیا هاتن و چوونی ب رێیا چەندین هژمارێن تەلەفۆنێ ب هێلا گەرم.
دەزگەهێ خێرخوازییێ بارزانی به‌ر ب ده‌زگه‌هه‌كێ نێڤده‌وله‌تی پێنگاڤان تاڤێژه، كو ژبال به‌ریتانیایێ موله‌تا كار كرنێ وه‌كه ده‌زگه‌هه‌كێ نێڤده‌وله‌تی پێ هاته دان و د نها دا دكاره ل به‌ریتانیا و هنه‌ك وه‌لاتێن دن یێن سه‌ر ب به‌ریتانیایێ كارێن خوه یێن خێرخوازیێ پێك بینه.
وه‌كه تێ زانین ل سه‌ده‌یێن ده‌ربازبوویی دا، ده‌ما كو به‌ریتانیا هكومرانییا عێراقێ د كر وه‌ك داگیركاره‌كێ، به‌رده‌وام دژایه‌تییا بزاڤا رزگاریخوازا كوردستانێ دكر و ئێرش ل هه‌مبه‌ر سه‌ركرده و رێبه‌رێ بزاڤا رزگاریخوازا كوردستانێ و هزرا بارزان پێك د ئانی و د نها ژی دا دانپێدان و مۆله‌تا كاركرنێ ب دەزگەهێ خێرخوازییێ بارزانی دده. ئه‌ڤه ژی سه‌ركه‌فتن و ده‌ستكه‌فته‌كه دن ژبۆ گه‌لێ كوردستانێ.
