ئەرا ژنەیل فرەتر چاخەوبوون؟
شەفەق نیوز/ یەکیگ لە گیچەڵە گەپەیل ژنەیل گردەوبوین چەوریە لە زگ و ناوقەیان، کە هاتێ کاریگەری وەبان رەنگینیان بیاشتوود، بیجگە لە لە زەردەیل تەندروسی.
لە رووژنامەی "تایمز ئۆف ئیندیا"، راپۆرتیگ لەوباوەتە خریاسە روی باس لە کووبوینەوەی چەوری لە دەور زگ کەێد.
وەپای راپۆرتەگە چەوری زگ و ناوقەێ دوو جویرە، چەوری ژیر پووس و چەوری ئەندامەیل ناو زگ، کە جویر دویەمیان گیچەڵ فرەتریگ دروسکەێد ئایەم تویش مەترسیەیل بیماری دڵ و شەکرەی جویر دویەم و هەوکردن کەێد.
ئاڵشتبوین هۆرمۆنەیل هووکار سەرەکیە ئەرا قەڵەوی ژنەیل، چوینکە وەرد چگنە ناو تەمەن هۆرمۆن ئەسترۆجین و پرۆجسترۆن و کۆرتیزۆل دەور گەپیگ لە بەشەوبوین چەوری لەش دوینن، هۆرمۆنی ئەسترۆجین وەرد وسیان سووڕ مانگانە كەمەو بوود، كە فەرمان رێكخسن بەشەوکردن چەورییە، وەی مدووە چەوری لە زگ فرەتر کووەوبوود، هۆرمۆن كۆرتیزۆل لە وەخت شەكەتی زیاتر بوود، یەیش چەوری زگ زیاتر کەێد.
وەرگیری لەش ئەرا کار ئەنسۆلین هیلێد چەوری لەش کووەوبوود، وە تایوەت لە دەر زگ، یەیش سەرەتایگە ئەرا جویر دویەم بیماری شەکرە.
هووکار ترەک سیتەم خوەراک و شیواز ژیان و خەفتنە ئەرا نموونە؛ خواردن شەکر و شیرینی فرەیگ وەرد خوەراک ناتەندروس، ەم جویلیان و وەرزشنەکردن و شیویان و بەدی خەفتن، یەیش هووکارە ئەرا کووەوبوین چەوری وەدەور ناوقەێ.
