هەواڵی کوردستان ئێستا

شەفەق نیوز/ سەرچەوەیگ ئەمنی لە پارێزگای نەجەف، ئمڕوو یەکشەممە، خەوەردا لە کوشیان هاوڵاتیگ نەجەفی وەشیوەی ستەملێکریایگ لە پارێزگای دیوانیە لە باشوور عراق.

سەرچەوەگە وە ئاژانس شەفەق نیوز راگەیان "هاوڵاتیگ خەڵک نەجەف کە خاوەن ماشین تەکسیگ بویە وەلایەن چەن کەسیگ ئەرا شوینیگ لە پارێزگای دیوانیە وە کرای گیریایە، لە وەخت رەسینی ئەرا ئەو شوینە کوشتنەسێ و تەرمەگەی فڕەدانە و ماشینەگەی دزینە، و ئەرا شوین نادیاریگ واینە".

وتیش؛ " هێزە ئەمنیەیل وەبان ئاگادارکردنەوەیگ تەرمەگە پەیاکردنە ئەرا پزیشک دادوەری کلکریا تا رێکار یاسایی ئەرای ئەنجام بدرێد".

لە رویداویگ ترەک سەرچەوەیگ ئەمنی لە پارێگای زیقار خەوەردا لە مردن و زەخمداری 5 هاوڵاتی وە رویداو هاتوچوی لە باکوور پارێزگاگە.

سەرچەوەگە وە ئاژانس شەفەق نیوز راگەیان، "رویداویگ هاتوچوی لەبان ری گشتی ناوەین میسان و زیقار باکوور پارێزگاگە رویدایە، لەناوەین ماشینیگ (سۆرینتۆ) و (جی ئێم سی)، رویداەگە بویەسە مدوو مردن کەسیگ و زەخمداری چووار کەس".

وتیش؛ "گشت زەخمدارەیل خەڵک میسانن ئەرا نزیکترین بنکەی تەندروسی کلکریانە".