عراق.. خوەیکوشتن دویەتیگ و پەیاکردن تەرم پیاییگ هندی و دەسگیرکردن جادووباز و بازرگانەیل هووشبەری
شەفەق نیوز/ سەرچەوەیگ ئەمنی لە بەسرە، ئمڕوو دووشەممە، خەوەردا لە خوەیکوشتن دویەتیگ وە گولە، و هیزیگ ئەمنی تەرم پیاییگ هندی پەیا کرد، و ژن و پیاییگ لە بەغداد لەبان بازرگانیکردن وە مادەی هووشبەر دەسگیر کریان، و لە نەجەف کابرایگ جادووباز دەسگیر کریا.
سەرچەوەگە ئەرا ئاژانس شەفەق نیوز وت: دویەتیگ لە تەمەن 18 ساڵان وە گولەی چەک باوگی لەناو ماڵەگەی لە پارێزگای بەسرە خوەی کوشت، و مدووەیل خوەیکوشتنی ئاشکرا نەوی.
وتیش: هیزیگ ئەمنی تەرمەگە ئەرا پزشک دادوەری برد، و لێکۆڵینەوە لە رویداوەگە واز کریا.
لە بەغدا، سەرچەوەیگ ئەمنی ئەرا ئاژانس شەفەق نیوز وت: پیاییگ هندی لەداڵگبوی ساڵ 1965 لەناو هوتێلیگ لە شار کازمیە گیانی لەدەسدا، و راپۆرتەیل ئویشن مردنی سروشتیە چوینکە بیمار بویە.
لەلاییگ ترەک، سەرچەوەگە دیاری کرد کە هیزیگ ئەمنی چگە ناو ماڵیگ لە ناوچەی بەغداد جدیدە، و ژن و پیاییگ دەسگیر کرد کە شوینەگە ئەرا بازرگانیکردن وە مادەی هووشبەر وەکار تیەرن، دیاری کرد کە پەنج کیسەی مادەی کریستال هووشبەر پەیا کریا.
لە نەجەف، سەرچەوەیگ ئەمنی ئەرا ئاژانس شەفەق نیوز وت: هیزیگ ئەمنی خاوەن هەشمار (أنس النجفي) لەبان فەیسبووک دەسگیر کرد، خەڵک پارێزگای بابل بوی، جادووبازی کەێد، و ژنەیل ئەرا پویل و سێکس خەڵەتنێد.
سەرچەوەگە دیاری کرد کە دەیان سکاڵا لەبان ئی کابرا لە دادگا توومار کریاس، مە کابرا ئەرا لێکۆڵینەوە زیندانی کریا.
