هەواڵی کوردستان ئێستا

باڵیۆزی ئەمەریکا لە عێراق ئالینا ڕۆمانۆوسکی پەیامێکی سەبارەت بە هەڵبژاردنەکانی پەرلەمانی هەرێمی کوردستان بڵاوکردەوە و دەڵێت گرنگە هەمووان بەشداری لە هەڵبژاردنەکانی پەرلەمانی هەرێمی کوردستانی عێراقدا بکەن و دەنگییان ببیسترێت. باڵیۆزی ئەمەریکا لە پەیامەکەیدا وتی، " دەنگدان بڕبڕەی پشتی دیموکراسییەکی سەرکەوتووە. هەروەها داوا لە سەرجەم پارت و کارەکتەرە سیاسییەکان دەکەین دڵنیاببنەوە لە هەڵبژاردنێکی ئازاد بەبێ توندوتیژی و ترساندن و ئەوەشی کە هەڵبژاردن ڕەنگدانەوەی خەڵکەکە بێت." لە کۆتایی پەیامەکەیدا گوتی، " ئەمەریکا پابەندە بە ئاسایش و سەقامگیری و سەروەری عێراقەوە و پێکەوە ئەم هاوبەشییە بەرەپێشەوە دەبەین لەگەڵ هەموو خەڵکی عێراقدا بە خەڵکی هەرێمی کوردستانیشەوە." دوای بانگەشەیەکی گەرم بۆ هەڵبژاردنی خولی شەشەمی پەرلەمانی هەرێمی کوردستان کە لە 25ی مانگی نۆ دەستیپێکرد و 15ی مانگی دە کۆتایی هات، دەنگدانی گشتی ئەمڕۆ یەکشەممە ڕێکەوتی20ی دەی 2024 دەستیپێکرد. لە سەر ئاستی چوار پارێزگاکەی هەرێمی کوردستان سەدان چاودێری وڵاتان و ڕێکخراوەکانی و ناوخۆیی و نێودەوڵەتی چاودێری بەڕێوەچوونی پرۆسەکە دەکەن. هەروەها نوێنەری چەندین وڵاتان و رێکخراوە نیودەوڵەتییەکان چاودێری هەڵبژاردنەکان دەکەن لەوانە نەتەوە یەکگرتووەکان. محەمەد ئەلحەسان، نوێنەری تایبەتی سکرتێری گشتی نەتەوە یەکگرتووەکان بۆ عێراق سەرۆکی نێردەی یونامی، لەگەڵ بەرپرسی دەستەی کۆمسیارانی کۆمسیۆنی باڵای سەربەخۆی هەڵبژاردنەکان لە هەولێر کۆبوویەوە و گوتی "ئەمە بۆ کوردستان ڕۆژێکی مێژووییە و پیرۆزبایی لە خەڵکی ئەم هەرێمە دەکەین بۆ ئەم ئاهەنگە دیموکراسییە. هیوادارین هەموو شتێک بە ڕێکوپێکی و بێکێشە بەڕێوەبچێت."