پولیس ژینگە نزیکەی 90 کارخانەی یاساشکن لە عراق بەسێد ئەرا نواگیریکردن پیسبوین وا
شەفەق نیوز/ وەڕیەوبەرایەتی پولیس ژینگەی عراق، ئمڕوو یەکشەممە، ئاشکرای لەسانن نزیکەی 90 کارخانە کرد، لەبان شکانن مەرج و رینمایەیل ژینگەیی، لە هەڵمەتێکی ئەرا سنووردارکردن پیسبوین وا.
عەمید سائر حەمید وەڕیەوبەر پولیس ژینگە ئەرا ئاژانس شەفەق نیوز وت: پولیس ژینگە وە فەرمان محمد شیاع سودانی سەرۆک وەزیرەیل و عەبدولئەمیر شمەری وەزیر ناوخۆ، دەسکردە بەسانن چالاکییەیل پیشەسازی تایبەت وە قیل و کارخانەیل خشت و روین کە مووڵەت ژینگەیی نەیرن.
دیاری کرد کە 61 کارخانەی خشت بەسیا کە مووڵەت ژینگەیی نەیرن، وەگەرد 27 کارخانەیگ ترەک کە یاسا شکاننە.
حەمید وتیش: ئی مارخانەیلا کە بەسیانە لە بەغداد و ئەو پارێزگایل عراق بوین.
وەزارەت ژینگە ئمڕوو وۆرکشۆپ تایبەت لەباوەت پیسبوین ژینگە ئەنجام دا، پەیامنێر ئاژانس شەفەق نیوز ئامادەی بوی، و جاسم فەلاحی جینشین وەزارەتەگە لە وتار وازکردنی وت: چوار دەیەی لە جەنگ و نائارامی ئەمنی و سیاسی، وەگەرد سەختیەیل ئابووری و جەنگ تیرۆر، رەسیە کاریگەری رخداریگ لەبان ژیرخانەیل.
فەلاحی وتیش: ئەو گردەوبوینە کە نوێنەرەیل وەزارەتەیل گردەو کرد، لە چوارچیوەی نواگیریکردن بەرزەوبوین نشانەیل پیسبوین لە بەغداد تیەێد، وە سەرپەرشتی محمد شیاع سودانی سەرۆک وەزیرەیل، و دەسەیگ وە سەرۆکایەتی سڵاکار هونەری وەزارەتەگە، عەمار عەتا، و نوێنەرەیلیگ لە ئەمیندارێتی بەغداد و وەزارەتەیل کارەبا و نەفت دروس کریا، ئەرا پیشکەشکردن تەمەیل ئەرا ئەنجومەن وەزیرەیل.
فەلاحی دیاری کرد کە ئامانج گردەوبوینەگە سنووردارکردن وەرپرسایەتی لایەنەیل چەودیاریکردن و لایەنەیل پیسکەرە، و دووپات کرد وەخشین وەگەرد هویچ کاریگ نییە کە کاریگەری بەدیگ لەبان تەندروسی هاوڵاتیەیل بیاشتوود.
وتیش: وەزارەت ژینگە وەگورەی سایت خوەی ئەو لایەن وەرپرسەسە لەبان چەودیاریکردن چالاکیە پیسکەرەیل، و بایەسە ئی چالاکیەیلە پابەند بوون وە چارەکردن پیسکەرەیل، وەتایبەت ئەوانەگ مووڵەت ژینگەیی وەرگردنە.
فەلاحی دووپاتیش کرد کە پیسبوین لە بەغدا رەسیەسە ئاست رخداریگ لەوەر پابەندنەوین وە یاسا وریکارەیل ژینگەیی، کە وسیانیگ جددی لە گشتی خوازێد.
هەر ماوەی جاریگ بوو کبریت لە کەشوهەوای بەغدا زاڵەو بوود، و بەشیک لە خەڵک شارەیل ناوڕاس و خوەرهەڵات عراقیش داد لە بڵاوبوین دویکەڵ خەسیگ کەن، کە تا چەن رووژیگ لە ئاسمانیان مینیێد.
