سیستانی هەفت خاڵ ئەرا ئارامی عراق دیاری کەێد
شەفەق نیوز/ مەرجع باڵای شیعە لە عراق، سەید عەلی سیستانی، ئمڕوو دووشەممە، هەفت خاڵ ئەرا ئارامی عراق دیاری کرد، و دووپات کرد کە ری درویژیگ ها وەردەم عراقیەیل ئەرا وەجیهاوردنی.
ئەوەیش وەگورەی بەیاننامەیگ لە نویسنگەی سیستانی لە نەجەف هات، لە پشت پیشوازیکردنی، وەرجە نیمەڕو ئمڕوو، لە محمد ئەلحەسان، نوینەر ئەمیندار گشتی نەتەوە یەکگرتگەیل و سەرۆک تیمەگەی لە عراق (یونانی) و شاند یاوەری.
بەیاننامەگە دیاری کرد کە حەسان باسیگ کوڵیڕ لە ئەرکەیل تیم ناودەوڵەتی ئەرا سیستانی پیشکەش کرد، و ئەو ئەرکەیلە کە خوازێد لەماوەی بانان جیوەجییان بکەێد.
وەرانوەر ئەوە، سیستانی پیشوازی لە ئامادەبوین نەتەوە یەکگرتگەیل لە عراق کرد، و ئومێد سەرکەفتن لە ئەرکەیلیان خوازێد.
سیستانی باس ئەو سەختیەیل گەورە لە رەی عراق کرد، و زیان گەلی لە زیاتر لە یەی چین.
سیستانی وتیش: بایەسە عراقیەیل -وەتایبەت نەختینە هوشیارەیل- لەو ئەزموونەیلە یای بگرن کە وەپییانەو رەد بوین، و گشت رەنجیگ بیەن ئەرا وەپشتسەرنان شکەستەیلیان، و کار جددی بکەن ئەرا وەدەسهاوردن بانانیگ خاستر ئەرا وڵاتیان تا گشتی لە ئاسایش و ئارامی و گەشەکردن بوود، و دووپات کرد کە ئەوەیش وەبی ئامادەکردن پلانیگ زانستی و کارا ئەرا وەڕیەوبردن وڵاتەگە وە پشتبەسین وە بنەمای توانداری و دەسپاکی لە وەرگردن پۆستەیل وەرپرسایەتی وەدەس نیەکەفێد، و نەهیشتن دەسوەردان دەرەکی وە گشت رویەیلی، و زاڵکردن دەسەڵات یاسا، و سنووردارکردن چەک ئەرا دەس دەوڵەت وەتەنیا، و دژایەتی گەندەڵی لە گشت ئاستەیل.
سیستانی وتیش: باوجی دیارە ری درویژیگ لە وەردەم عراقیەیل هەس تا بڕسنە وەجیهاوردنی، خودا یاریان بوود.
لەباوەت رەوشەیل سەخت ناوچەگە، سیستانی باس ژان قویلی کرد لەبان ئەو نەهامەتی وەردەوامە لە لوبنان و غەززە، و داخی ئەرا بیدەسەڵاتی کۆمەڵگای ناودەوڵەتی لە چەسپانن چارەسەریەیل کارا ئەرا وسیانی، یا لەلای کەمەو دویرخستن مەدەنیەیل لە نەهامەتی ئەو تونەڕەویە کە قەوارەی ئیسرائیلی جیوەجی کەێد.
