هەواڵی کوردستان ئێستا

سەرۆک وەزیرانی ئیسرائیل بنیامین نەتانیاهۆ لە میانی سەردانێکیدا بۆ کەرتی غەززە گوتی حەماس دوای کۆتایی هاتنی شەڕ فەرمانڕەوایەتی ناوچە فەلەستینییەکان ناکات و ئیسرائیل توانا سەربازییەکانی ئەو گروپە ئیسلامییەی لەناوبردووە. نەتانیاهۆ بە یاوەری وەزیری بەرگری نوێی ئیسرائیل، ئیسرائیل کاتز و فەرماندەی لەشکری ئیسرائیل لە شوێنێکی نادیارلە غەززە سەربازەکانیان بەسەرکردەوە. نەتانیاهۆ لە لێدوانێکدا ئاماژەی بەوە کرد ئیسرائیل دەستبەرداری هەوڵەکانی نابێت بۆ دیاریکردنی شوێنی ئەو 101 بارمتەی کە ماونەتەوە و پێدەچێت هێشتا لەناو غەززەدا بن، هەروەها پاداشتی 5 ملیۆن دۆلاری پێشکەشکردووە بۆ گەڕاندنەوەی هەریەک لە بارمتەکان. هێرشەکانی ئیسرائیل دەستیان پێکرد پاش ئەوەی حەماس لە 7 ی مانگی دەی ساڵی ڕابردوو هێرشێکی لەناکاوی کردە سەر ئیسرائیل و بەهۆیەوە زیاتر لە 1200 کەسی ئیسرائیلی و بیانی کوژران و زیاتر لە 240 کەسیش کە ژمارەیەکیان منداڵن لەلایەن حەماسەوە بە بارمەتە بران. سەرچاوە: ڕۆیتەرز