باڵیۆزی ئیسرائیل لە واشنتن دەڵێت ئاگربەست لەگەڵ حزبوڵا نزیکە
2024-11-25 19:10:24 - سەرچاوە: دەنگی ئەمەریکا
مایک هێرزۆگ باڵیۆزی ئیسرائیل لە واشنتن ڕایگەیاند هێزەکانی ئیسرائیل و چەکدارانی حزبوڵا دەشێت بۆ چەند ڕۆژێک ئاگربەست ڕابگەیەنن. هەرزۆگ ڕۆژی دووشەممە بە ڕادیۆی سەربازی ئیسرائیلی ڕاگەیاند دانوستانەکان لەسەر هەندێک خاڵ بەردەوامن و حکومەت بڕیاری کۆتایی لەسەر ڕێککەوتنەکە دەدات. باڵیۆزەکەی ئیسرائیل گوتیشی نزیکن لە ڕێککەوتن و ڕەنگە بۆ چەند ڕۆژێک ئاگربەست ڕابگەیەنرێت. ئیسرائیل دەڵێت ئەگەر حزبوڵا بە پێی بەرپرسیارێتی خۆی نەجوڵێتەوە ئەوا ئۆپەراسیۆنەکانی دەستپێدەکاتەوە و هەتا ئێستاش هیچ ڕێککەوتنێک لەسەر ئەم بابەتە نەکراوە. لە ڕێککەوتنەکەدا داوای کشانەوەی چەکداری حزبوڵا و هێزەکانی ئیسرائیل لە باشووری لوبنان دەکرێت. لە ساڵی 2006 بە بڕیاری نەتەوە یەکگرتووەکان ململانێکانی هەردوولا ڕاگیران. ئێستا ئیسرائیل دەڵێت ئەگەر حزبوڵا بەردەوام بێت و لە باشووری لوبنان بوونی چەکداری خۆی بسەلمینێت، ئەوا دەتوانێت ئۆپەراسیۆنی سنوور بەزاندنی هاوشێوەی حەماس ئەنجام بدات. لوبنان دەڵێت ئیسرائیل بڕیارنامەی ساڵی 2006 پێشێل دەکات. سەرچاوە: فرانس پرێس
