هەواڵی کوردستان ئێستا

شەفەق نیوز/ دەسەی کەشناسی عراق، ئمڕوو شەمە، هویردەکاری کەشوهەوا لەماوەی رووژەیل بانان  راگەیان، و مەزەنەکەێد واران بوارێد وەگەر بەڵاچە و دروسبوین تەم و داوەزیان کەمیگ پلەی گەرمی.

لە راپۆرتیگ رووژانەی دەسەگە کە کەفتیەسە وەرچەو ئاژانس شەفەق نیوز هاتیە، سوو کەش ئەورە لەناوچەیل باکوور و وەگەرد واران وارین سووک تا مامناوەندیگ، گاجاریگ بەڵاچە بوود لە خوەرهەڵات، وەگەرد وەفر وارین لەدەمەو شەوەکیەگەی لەبان بەرزایی کویەیلە.

لەناوچەیل ناوڕاس و باشوور، کەش نیمەئورە وەگەرد دەرفەت واران وارین سوکیگ لەناوچەیل خوەرئاوا ئەور دروسبوود، مەزەنەی دروسبون تەم کرێد لە وەخت  شەوەکی و کەمەکەمە داوزێد.

وە پای راپۆرتەگە، لە ناوچەل ناوڕاس و باشوور کەمیگ پلەی گەرمی داوەزێد، لە ناوچەیل باکوور وە نزیکی مینێد. 

لە راپۆرتەگە دیاریکرد مەودای نوڕین لەناوەین 6-8 كم بوود، لە وەخت تەم ها ناوەین   2-4 كم گاجاریگ ئەرا کەمتر لە   1000 مەتر داوەزێد.

وەپای راپۆرتەگە بەرزترین پلەی گەرمی سوو وەیجویرەس:

دهۆک و هەولێر و سلێمانی : 14 پلەی سەدی

کەرکوک سەڵاحەدین و ئەنبار و دیالە: 15 پلەی سەدی

بغداد و نەینەوا: 16 پلەی سەدی

واست: 17 پلەی سەدی

کەربەلا و نەجەف: 18 پلەی سەدی

میسان و دیوانیە و زیقار و موسەنا: 19 پلەی سەدی

بەسڕە: 20 پلەی سەدی

لە رووژ دووشەممە، کەش ساماڵە وەگەرد بڕیگ ئەور و دەرفەت دروسبوین تەم لە شەوەکی و بەرزەوبوین کەمیگ پلەی گەرمی لەناوچەیل ناوڕاس و باکوور، و لەناوچەیل باشوور نزیکە، مەودای نوڕین ها ناوەین  6-8 كم، لەوەخت تەم هاناوەین  2-4 كم.

رووژ سێشەممە، کەش ساماڵە وەگەرد بڕیگ ئەور، دەرفەت دروسبوین تەم لە شەوەکی و پلەی گەرمی نزیکە لە رووژەیل گوزەشتە، و مەودای نوڕین ها ناوەین 6-8 كم لەوەخت تەم هاناوین  2-4 كم.

لە رووژ چوارشەممەی ئایندە، مەزەنەکرێد کەش نیمەئەور بوود، وەگەرد بەرزەوبوین کەمیگ پلەی گەرمی لەناوچەیل ناوڕاس و باشوور لە ناوچەیل باشوور کەمیگ داوەزێد.