هەواڵی کوردستان ئێستا

شەفەق نیوز/ وە دەنگدان پەرلەمانتارەیل، و ئەندازیاریی دەرەکی دیاریگ، پەرلەمان لوبنان 14هەمین سەرۆک کۆمار هەڵوزارد، لە سەرکردایەتی سوپا ئەرا کۆشک سەرۆکایەتی بەعبدا.

 عیماد جۆزیف عۆن، کە لە ساڵ 2017 فەرماندەیی سوپا کرد، لە دویەم دانیشتن دەنگدان 99 دەنگ لە بنچینەی  128 دەنگ وەدەس هاوردڕ وەلێ یە یەکەمین جار نییە کە فەرماندەی سوپا بڕەسێدە یەکەم پۆست هن مەزهەو مارۆنی لە سیستەم سیاسی لوبنانی، و لەی هەڵوژاردنە کە بڕ گەورەیگ لە باڵیۆز و دیبلۆماسیەیل بیگانە و عەرەب چەودیارییی کردن، کە دەوڵەتەیلیان گرنگی دەن وە پڕەوکرد ئی پۆستە کە یە نزیکەی دوو ساڵە چووڵە.  ئەراوە، دیارە سەرۆک نوو لوبنان، کە لەداڵگبوی ساڵ 1964ە، پابەندە سەرچەوەیل نیگەرانی و گرنگی دەوڵەتەیل هەرێمی و ناودەوڵەتی بکڕێدە وەرچەو کە ئەرا چەن مانگیگ کار ئەرا یەکلاییکردن قەیران سیاسی گیرهاتگ لە لوبنان کردن، کە دویای دەرچگن میشێل عۆن سەرۆک وەرین وەچووڵی مەن.خەوەر نوویگ نییە ئەرا لوبنانیەیل کە فەرماندەی سوپا بڕەسێدە تەخت سەرۆکایەتی کۆمار، کە وەرجیەی هەرلە فوئاد خوری و ئەمیل لەحود و میشێل سولەیمان رەسینە ئی پوستە، ئەراوە سەرۆک نوو کۆمار کە زوانەیل ئینگلیزی و فەڕەنسی زانێد، و لە سەرتای هەشتایل سەدەی گوزەشتە چگە ناو سەربازی، و لە پۆستەیل سەربازی وە پلەی بەرزەو بوی، کەفتیەسە نوای تاقیکردنیگ جیاواز وە نووڕین سیاسەتمەدارەیل و هاوڵاتیەیل ئاسایی.  هاتێ وینەگەی هەناێ چوودە بان سەکوو تا یەکەم وتاری پیشکەش بکەێد جویر سەرۆک نوو وڵات، یەکەم تاقیکردنی بوود کە کوتر مەدەنی لەجیای بەرگ سەربازی پووشێد، کە کار سەربازی وەتەواوی لە کار مەدەنی و سەرۆکایەتی مەردم و وڵات جیاوازە.سەرۆک جۆزیف عۆن لەداڵگبوی ناوچەی سن ئەلفیل لە قەزای متن، وەلێ لە بنچینەو خەڵک ناوچەی عیشیە لە باشوور لوبنان، و مووڵەت لە زانستەیل سیاسی و لە زانستەیل سەربازی دیرێد، و چەن نشانەیل وەدەس هاورد، لەلییان سێ نیشانەی جەنگ، و دوو نشانەی زەخمداری، نیشانەی یەکێتی نیشتمانی، و نیشانەی گوڵسوو باشوور، وەگەرد نیشانەی شایستەی لوبنانی لە پلەی سێیەم ئیجا دویەم، و نیشانەی (ئەرز) نیشتمانی لە پلەی (سوار)، و نیشانەی دژە تیرۆر.  (لاپەرەی نوو لە میژوو لوبنان)، کە سەرۆک نوو لە یەکەم وتارەگەی وەیجویرە باسی کرد، لەناو تەقەلا دا روخسار ئەو سیاسەتەیلە بکیشێد کە نیاز دیرێد جیوەجی بکەێد، و پەیام ئەرا دەیشت و ناو لەناوی بوی، ئەرا دڵنیاکردن گشتی یا گیشان کڕە پانەیل لە گرنگەیل سەرۆکایەتی کۆمار کە عیماد جۆزیف عۆن زانێد کە کەفتنەسە دەس سەرۆکایەتی حکومەت کە لە پەرلەمانەو پشتگیری کریاس.  دیارە دیارترین پەیام کە جۆزێف عۆن کلی کرد، دووپاتکردن لە ماف دەوڵەت کە خوەی تەنیا چەک وە دەسی بوود، و کارکردن سوپا ئەرا جڵەوکردن سنوورەیل، و ئەوەسا کڕیان کیشیەێد (نشانە ئەرا ئیسرائیل و سوریا)، و مکیسکردن ئەرا گفتوگۆی سیاسی وەرگری تەواویگ کە بیلێد دەوڵەت بتوەنێد داگیرکاری ئیسرائیل لاوەێد و وەڵام پەلاماری ببەێد، و دروسکردن خاسترین پەیوەندی وەرد دەوڵەتەیل عەرەب، بیجگە قسەکەی کە وت: دەرفەتیگ میژووی دیریمن ئەرا بیناکردن گفتوگۆ راسیانە وەرد دەوڵەت سوریا لە گشت باوەتەیل گیرهاتگ وەتایبەت رێزگردن لە سەروەری و ئارامی دوو وڵات. لە پەیامەیلی ئەرا ناو لوبنان، ئارەزوو لە نزیکەوبوین وەرد حزبولڵا و مەزهەو شیعە وەگشتی دیار بوی، و دیارترین قسەیلی، پەیمان دووارە ئاوەدانکردن ویرانکاری دوژمن ئیسرائیلی لە باشوور و زاحیە و بیقاع و گشت ناوچەیل لوبنان، و دووپاتکردن لەبان ئەوە کە شەهیدەیل لوبنان گیان ئیرادەمانن، و دیلەیلمان ئەمانەتن لە ملمان، وەگەر وتنی؛ ئەگەر یەکیگمان شکیا، گشتمان شکیمن، ئەوەیش لە نشانەیگ ئەرا رازی نەوین وەو قسەیلە کە بەشیگ لە سیاسەتمەدار و ڕاگەیانکارەیل بڵاوی کەن کە مەزهەو شیعە شکیاوە، و دی قسەیگ لە کاروبار سیاسەت و ئەمنی نەیرێد.هەمیش لە ناو لوبنان؛ سەرۆک عۆن باس نەوین خەمسەردی کرد لە مقیەتیکردن پویل ئەوانەگ خستنەسە بانکەیل، و دانوەپیدان وە قەیران حکومڕانییگ کە بایەسە کار سیاسی و ئابووری ئاڵشت بکەێد، و نەهیشتن دەسوەردان لە دادوەری، و پشتگیریکردن ئەرا تاوانکار و گەندەڵ نییە، و مافیا و قاچاخکردن هووشبەری و پویل شووردن نییە، و گردن ئابووری ئازاد، وەگەرد تەقەلای قایمکردن تووڕەیل ئاسایش کۆمەڵایەتی و ئازادیی راگەیانن لە چوارچیوەی دەستوور.   بایەسە سەرۆک نوو مکیس ئەرا سڵاکاری پەرلەمانی بکەێد، ئەرا ئەرکدراکرنیگ لە شەست نەجیب میقانی لە سەرۆکایەتی حکومەت، تا سەردەم نوویگ لە حکومڕانی باێدە دیر وەلێ دیارە سەرۆک عۆن خوازێد جویر دەسەڵاتداریگ سەربازی دیار نیەێد لەناو وڵاتیگ ململانێی تایفە و مەزهەوەیل و هیزەیل سیاسی دیرێد کە وە زڕنگی ناسیانە، و لە دویای جەنگ ناوخوەیی وەرجە زیاتر لە 30 ساڵ تا ئیسە چەمکەیل وڵاتەگە گردنە.