هەواڵی کوردستان ئێستا

شەفەق نیوز/ سەرچەوەیگ لە پولیس پارێزگای کەرکوک، ئمڕوو یەکشەممە، خەوەردا لە پەیاکردن تەرم گەنجیگ وە گولە کوشیاس لەناوڕاس ناوەند پارێزگاگە.

سەرچەوەگە ئەرا ئاژانس شەفەق نیوز وت: پولیس ئاگاداری لە تەرم گەنجیگ لەداڵگبوی ساڵ 2000 وەناو ( غ س م) وەرگرد کە لەناو ماڵەگەی بویە لە گەڕەک زاینی، کە دیاری کریا ئەو گەنجە وە دوو گولە دریاس لە سەری و کوشیاس.

سەرچەوەگە وتیش: هیزیگ لە پولیس رەسیە ماڵەگە و لێکۆڵینەوە لە رویداوەگە واز کرد، و تەرمەگە ئەرا پزشک دادوەری برد.

لە رویداویگ ترەک، فەرماندەیی ئۆپراسیۆنەیل بەغداد، ئمڕوو یەکشەممە، خەوەردا لە رزگارکردن دویەتیگ رفیاگ، و توومەتبار وە رفیانی دەسگیر کریا لە باشوور پایتەخت.

فەرماندەییەگە لە بەیاننامەیگ وت: وە رەنج هەواڵگری بەرزیگ ئەرا وەشوینکەفتن توومەتبارەیل وە تاوانەیل رفیان، و دویای وەرگردن فەرمان دەسگیرکردن دادوەری، هیزیگ لە فیرقەی ئامێری پولیس فیدڕاڵی و. هاوبەشی مەفرەزەیل نویسنگەی دژە تاوان/ دۆرە، وە هەماهەنگی وەرد دەزگا و ئاژانسەیل هەواڵگری، توەنستن دویەتیگ رفیاگ ئازاد بکەن و توومەتبار وە رفیانی دەسگیر بکەن.

 وتیش: ئەوە دویای رەسین زانیاری تیژبوینیگ لە رفیان هات، کە دویای گردەوکردن زانیاری، رەسینە ماڵ تاوانکار لە ناوچەی دۆرە/ گەڕەک سیحە باشوور بەغدا، و دریا دەس لایەنەیل پەیوەندیدار.