English | عربي

پەرلەمانتارێک چۆنیەتیی دانەوەی پاشەكەوتی مووچەی فەرمانبەران دەخاتە ڕوو


پەرلەمانتارێک چۆنیەتیی دانەوەی پاشەكەوتی مووچەی فەرمانبەران دەخاتە ڕوو

2019/04/25 | 16:05

(هەواڵ كوردستان)- "پڕۆژەی چاكسازی یەكێك لە پڕۆژە زۆر گرنگەكان و دەبێ حكوومەت و پەرلەمان پەسندی بكەن"

بەهجەت عەلی سپینداری، پەرلەمانتاری پارتی و ئەندامی لیژنەی دارایی پەرلەمانی كوردستان، لە گفتوگۆیەكی تایبەتی (باس)دا، چەندین پرسی تایبەتی دارایی و دانانی بودجە و چۆنیەتیی دانەوەی پاشەكەوتی مووچەی فەرمانبەران دەخاتە ڕوو.

رای دەگەیەنێت، دەبێ حكوومەت میكانزمێك بدۆزێتەوە بۆ دانەوەی مووچە پاشەكەوتكراوەكان.

دووپاتیشی دەكاتەوە، كابینەی تازە بودجە بۆ پەرلەمان دەنێرێت.

سەرەتا ئاماژەی بەوە دا، چاوڕوانی پێكهێنانی حكوومەت دەكەن، بۆ ئەوەی پڕۆژە یاسای بودجەیان بۆ بنێرن، گوتی: "چاوڕوانی پێكهێنانی كابینەی تازەی حكوومەتی هەرێمی كوردستان دەكەین، ئەگەر حكوومەت فریا بكەوێت پڕۆژە یاسای بودجەی 2019 دەنێرێت بۆ پەرلەمان، دڵنیاین حكوومەتی تازە پڕۆژەكە دەنێرێت".

روونیشی كردەوە: "هەبوونی بودجە زۆر گرنگە بۆ هەر وڵاتێك و بۆ هەر حكوومەتێك، چونكە بودجە زمانی حكوومەتە بە شێوەی ژمارە و داتا".

جەختیش دەكاتەوە: "پێشتر بەهۆی قەیرانی دارایی و شەڕی داعش و پێنەدانی بەشە بودجە لە لایەن بەغداوە وای كردبوو حكوومەت بودجەی نەبێت و پلان و بەرنامەكانی جێبەجێ نەكات، بەڵام كابینەی نوێ بودجەی دەبێت و دەتوانێت پلانە ئابوویەكانی خۆی لە بودجە جێبەجێ بكات".

بەهجەت عەلی، پشتیوانیی لیژنەكەیانی بۆ دامەزراندنی 31 هەزار فەرمانبەری گرێبەست راگەیاند، گوتی: "پشتیوانی ئەوەین گرێبەستەكان بكرێنە فەرمانبەری هەمیشەیی، هەروەها بەشێكیش لە دەرچووانی زانكۆكان دابمەزرێندرێن، بەتایبەت یەكەمەكان".

ئەندامەكەی لیژنەی دارایی پەرلەمان، دڵنیایی خۆی پیشان دەدات لەوەی، پێدانی مووچە بەبێ پاشەكەوت بەردەوام دەبێت، گوتیشی: "بەدڵنیایی پێدانی مووچەی بێ پاشەكەوت بۆ فەرمانبەران بەردەوام دەبێت، وەكوو دیارە رێكکەوتنی حكوومەتی هەرێمی كوردستان و عێراق بۆ بودجەی 2019 هەیە، بۆیە ئەمساڵ مووچە كێشەی نابێت و بەشێوەیەكی رێكوپێك دابەش دەكرێت".

سپینداری، لەمیانەی قسەكانیدا ئاشكرای كرد، لەگەڵ حكوومەت كار دەكەن بۆ ئەوەی میكانزمێك بدۆزرێتەوە، تاوەكوو مووچە پاشەكەوتكراوەكانی مووچەخۆران بدرێتەوە، دەشڵێت: "دەبێت میكانزمێك یان دەرچەیەك بدۆزرێتەوە بۆ دانەوەی مووچە پاشەكەوتكراوەكان، بۆ نموونە، بە شێوەیەك بێت ئەو قەرزانەی لای هاووڵاتییانە بەر پاشەكەوتی مووچە بكەون".

زیاتر گوتی: "زەحمەتە حكوومەت پارەی هەموو مووچە پاشەكەوتكراوەكان بە کاش بداتەوە، بەڵام دەتوانێت رەقەم حیسابی بۆ فەرمانبەران بكاتەوە، بۆ ئەوەی فەرمانبەران بتوانن سوود لەم رەقەم حیسابییە وەربگرن و قەرزەكانی ئاو و كارەبا، لەگەڵ رسوومات و باج و كرێی خزمەتگوزارییەكانی پێ بدەنەوە ".

ئەو پەرلەمانتارە لەگەڵ ئەوەدایە، حكوومەت پەلە بكات بۆ دەستپێكردنی گەڕاندنەوەی پاشەكەوت، گوتیشی: "ئەو مووچانەی پاشەكەوت كراون، مافی فەرمانبەران و مووچەخۆرانە وەریان بگرنەوە و قەرزە لەسەر حكوومەت، بۆیە دەبێت میكانزمێك لە لایەن حكوومەت پەیڕەو بكرێت، بۆ دانەوەی ئەو قەرزانە".

پەیوەست بە دووبارە دەستكردنەوە بە خەرجكردنی پێشینەكانی هاوسەرگیری و خانووبەرە لە لایەن حكوومەت، ئەندامەكەی لیژنەی دارایی دەیگوت: "باوەڕ ناكەم ئەمساڵ پێشینەی هاوسەرگیری و خانووبەرە و قەرزەكانی تر دەست پێ بكەنەوە، چونكە ئەركی حكوومەت زۆر قورسە و قەرزی زۆری لەسەر شانە، ئێمە فشار دەكەین پێشینەكان دەست پێ بكرێنەوە، بەڵام كە حكوومەت نەتوانێت پارە دابین بكات، ئەوە ئێمە ناتوانین ئەو كارە بكەین".

ئەو لەگەڵ ئەوەشدایە، قیستی پێشینەكان لە فەرمانبەران وەرنەگیرێتەوە و بۆ ئەو بابەتە حكوومەت سوود لە مووچە پاشەكەوتكراوەكان وەربگرێت، گوتیشی: "ئێستا حكوومەت بڕیاری داوە ئەو پێشینەی لەسەر هاوسەری شەهیدان هەیە بەر لێخۆشبوون بكەوێت، هەروەها لەگەڵ ئەوەداین، تاوەكوو ژمارە حیسابی بۆ فەرمانبەران لە پرسی پاشەكەوت دەكرێتەوە، هیچ پێشینەیەك لە مووچەخۆران وەرنەگیرێتەوە، بەڵكوو دواتر لە پاشەكەوتی مووچە ئەو قەرزانە بدرێنەوە".

بەهجەت سپینداری، راشی گەیاند، بە نووسراوێكی فەرمی داوا لە لیژنەی دارایی پەرلەمانی عێراق كراوە، بۆ ئەوەی میوانداری بكرێن، كاتێك ئەو میواندرییە كرا، ئەوا لەگەڵیاندا بایەتە داراییەكانی هەولێر و بەغدا گفتوگۆ دەكرێن: "هەماهەنگی لەگەڵیاندا دەكەین، بۆ ئەوەی بتوانین هەرچی ماف و شایستە داراییەكانی هەرێمی كوردستانە لە پەرلەمانی عێراق دابین بكرێت".

بۆ دووبارە ئامادەكاریكردنەوە بۆ پڕۆژەی چاكسازی، ئەو پەرلەمانتارە گوتی: "پڕۆژەی چاكسازی، یەكێك لە پڕۆژە زۆر گرنگەكانە، كە حكوومەت و پەرلەمان لەسەری بوەستن، چونكە ئەو پڕۆژەیە دەبێت بە دەرچەیەك بۆ زیادكردنی داهات و دابینكردنی یەكسانی، بۆیە دەبێت حكوومەت و پەرلەمان ئەو پڕۆژەیە لە بەرژەوەندیی خەڵك پەسند بكەن، ئێستاش دەستمان بە جموجۆڵ كردووە، بۆ ئەوەی ئە پڕۆژەیە لە كاتێكی نزیكدا بنێردرێت بۆ پەرلەمان".

 








نیشانەکردن



زۆرترین






ڤیدیۆ- وێنە





Trending