کەشناسی عراق دڵنیایی لە شیواشیو کەشوهەوای ئی رووژەیل بانانە دەێد
شەفەق نیوز/ دەسەی کەشناسی و زەویلەرزەناسی عراق، ئمڕوو سێشەممە، مەزەنەی واران سووکیگ لە شارەیل باکوور و بەشیگ لە شارەیل ناوڕاس و باشوور خوەرئاوای وڵات دا، وەگەرد لەکە ئەور و داوەزیان پلەی گەرمی لەی دوو رووژە، و واران وارین رفت یا هەڵکردن خوەڵوتووز لەی رووژەیل ئایندە وەدویر زانست، کە هەمیشە لەی مەوقەیلە دروس بوود.
عامر جابری وەڕیەوبەر راگەیانن دەسەگە ئەرا ئاژانس شەفەق نیوز وت: وڵاتەگە هیمان هاناو کەشوهەوای زمسان، ئەراوە کەشوهەوا جیگر نییە، وەلێ کەشوهەوای ئی رووژەیلە گوزەشتە پارەکەیش وەیجویرە بوی، و هەمیشە لە تشرین دویەم دەسکەێدە واران سووکیگ، تا کەمکەم لە کانوون یەکەم و کانوون دویەم رفتەو بوود.
جابری وتیش: ئی وارانەیل دویاییە کاریگەری ئاشکرا داشتن لە نوقمبوین چەن ناوچەیگ لە بەغداد، و زەرەد وە بەشیگ لە خیزانەیل رەسان.
لە باوەت مەزەنەی کەشوهەوا، جابری دیاری کرد کە پرزە وارانیگ لە ساڵەیل باکوور وڵات و بەشیک شارەیل باکوور و ناوڕاس و باشوور خوەرئاوای وڵات هەس، وەلێ لە بەغداد پایتەخت نییە، و کەشوهەوا هەر وە رووشن وەگەرد لەکە ئەور مینێد لەی هەفتە، وەلێ هاتێ لەی دوو رووژ ئایندە پلەی گەرمی نزمەو بوود.
وتیش: مەزەنە کریەێد لەی ماوە دەرفەت واران بوود، وەلێ نەزانیاس چەنیگ رفتە، وەگشتی ئی هەفتە رووشنە.
لەباوەت خوەڵوتووز کە هەمیشە لەی مەوقەیلە هەڵکەێد، جابری دووپات کرد کە وەرجە نزیکەی مانگ و نیمیگ خوەڵوتووز هەڵکردر و ماوەی کەمیگ بوی، و هەمیش پارەکە کەم بوی، وەلێ ئیرنگە نشانەیگ لە هەڵکردن خوەڵوتووز لەی رووژەیل بانانە نییە.
ئیوارەی دویەکە یەکشەممە، دەسەی کەشناسی مەزەنە کرد پلەی گەرمی بەرزەو بوود، و کەشوهەوای وەهار لە رووژ سێشەممەو باێدە دی.
