هەواڵی کوردستان ئێستا

شەفەق نیوز/ دەسەی کەشناسی و زەویلەرزەناسی عراق، ئمڕوو چوارشەممە، ئاشکرای توومارکردن زیایبوین وەرچەویگ لە شمارەی زەویلەرزەیل کرد، وەتایبەت لە سێسویکەی سنووری ناوەین عراق و تورکیا و ئیران، کە دویەکە ناوچەگە زەویلەرزەی نوویگ وە هاز 5.1 پلە لەبان پەیمانەی ریختەر توومار کرد.

عەلی عەبدولخالق وەڕیەوبەر بەش زەویلەرزەناسی ئەرا ئاژانس شەفەق نیوز وت: زەنگ سەرەکی ناوچەگە لە چین زەنگەیل پیچەوانەس (Reverse Fault)، و گورجی زەویلەرزەی وەردەوامە، دیاری کرد کە روانگەیل عراقی رووژانە لە یەک تا هەفت زەویلەرزە توومار کەن، هازیان رەسێدە ناوەین یەک تا دوو پلە لەبان پەیمانەی ریختەر، بیجگە زەویلەرزەی هەفتانە وە تەکان سێ پلە، ئاگا لەلی هەس وەلێ تون نییە و بیوەیە.

وتیش: عراق کەفتیەسە بان پارچەی عەرەبی، کە وەرد پارچەی تورکی (ئەنادۆڵی) و پارچەی ئیرانی لە ناوچەی سنووری یەکانگیرەو بوود، دیاری کرد کە گورجی لەرزەگە کەفێدە زنجیرەی کویەیل زاگرۆس، کە تەکتۆنی هیلێد پارچەی عەرەبی بەێد لە پارچەی ئەنادۆڵی و ئیرانی، کە بوودە زەویلەرزە.

وەگورەی سەرچەوەیگ لە کەشناسی و زەویلەرزەناسی، دویەکە سێشەممە زەویلەرزەیگ وەتونی 5.1 پلە لەبان پەیمانەی ریختەر داد لە ناوچەگە، وەدویری 45 كم وەرەو باکوور شار هەولێر، لە سێسویکەی سنووری عراقی ئیرانی تورکی.

سەرچەوەگە ئەرا ئاژانس شەفەق نیوز وتیش: مەردم ناوچەیل نزیک سنوور لە لەرزەگە ئاگادار بوین، وەلێ بیوەی بوی.

 لە بەیاننامەی کوڵیگ دووپات کرد کە ئەو زەویلەرزە وە دویری 45 كم وەرەو باکوور شار هەولێر پایتەخت هەرێم کوردستان توومار کریا.