هەواڵی کوردستان ئێستا

شەفەق نیوز/ نێچیروان بارزانی سەرۆک هەرێم کوردستان، ئمڕوو یەکشەممە، داوا لە حکومەت عراق کرد گشت ریکارەیل ئەرا وەپارێزگاکردن هەڵەبجە تەواو بکەێد.

ئەوەیش لە بەیاننامەیگ وە بوونەی 37مین ساڵیاد کیمیاوارنکردن هەڵەبجە هات.

سەرۆک نێچیروان بارزانی لە بەیاننامەگەی وت: بمبارانکردن کیمیایی لەبان هەڵەبجە هەر تاوانیگ تەنیا نەوی، بەڵکم بەشیگ زیاندار لە زنجیرەی تاوانەیل و جینۆساید ئامامجی لەناوبردن گەل کوردستان بوی.

 وتیش: ئی گەلە کە تەنیا تاوانی ئەوە بوی کە داوای مافەیل شەرعی خوەی کرد لە ژیان و ئازادی، و هەڵەبجە بویە سومبولیگ ئەرا ستەمدیدەیی گەل ئیمە، و نشانەیگ ئەرا قیزەوەنی ئەو تاوانەیلە کە رژیم وەبانی جیوەجی کرد، و ئەگەر دادپەروەری راسگانی بویاتاد، وەنە ئەو نەهامەتیە خوەی تەنیا بەس بوی ئەرا دانوەپیدان گشت مافەیل شەرعی گەل کوردستان.

 دووارە دووپات لەبان گرنگی قەرەبووکردن خەڵک هەڵەبجە و گشت قوربانییەیل جینۆساید و ئەنفال کرد، و پیشکەشکردن خاسترین خزمەتگوزارییەیل لە گشت چینەیل ئەرایان، وتیش: ئەرک حکومەت عراقیە وەرپرسایەتی یاسایی و ڕەوشتی خوەی وەرانوەر قوربانیەیل هەڵگرێد، و گشت پابەندیەیلی ئەرا هەڵەبجە و خەڵکەگەی وەجی بارێد و دادپەروەری ئەرایان ئەنجام بەێد.

  نێچیروان بارزانی داوا لە حکومەت عراق کردیش گشت ریکارەیل وەپارێزگاکردن هەڵەبجە تەواو بکەێد، و دووپات کرد کە بایەسە کۆمەڵگای ناودەوڵەتی وەردەوام بوود لە تەقەلای دووارەنەوین ئیجویر تاوانیگ لە هەر شوینیگ لە جەهان.

وتیش: ئمڕوو هەرێم کوردستان وە قەوارەی دەستووری و فیدراڵی و گشت دەسکەفتەیلیر دەرئەنجام خەبات و قوربانیەیل شەهیدەیلە، و ئەرک بان شان گشتمانە وە یەکڕزی و یەکخستن مقیەتیی بکەیمن.

سەرۆک هەرێم کوردستان لە کۆتایی وت: وەفاداری ئەرا قوربانیەیل هەڵەبجە و گشت شەهیدەیل کوردستان وە قایمکردن یەکگردن و لەیەکفامسنن و هاوکاری تیەێد ئەرا مقی مافەیل گەل کوردستان.

کوشتار هەڵەبجە لە 16ی ئادار 1988، هەناێ رژیم سەدام حسێن وە چەک کیمیایی پەلامار شارەگە دار و بویە هوکار کوشیان زیاتر لە پەنج هەزار کەس مەدەنی، فرەیان ژن و مناڵ بوین، و زەخمداری سەخت هەزاران کەس ترەک، کە هیمان بڕیگ لەلییان زیان تەندروسی لەلی دیرن.

جی باسە کە محمد شیاع سودانی سەرۆک وەزیرەیل عراق، لە سێانزەی ئادار 2023، رەزامەنی ئەنجومەن وەزیرەیل راگەیان لەبان پڕۆژەی دروسکردن پارێزگای هەڵەبجە تا ئەرا ئەنجومەن نوێنەرەیل مل بکریەێد و لەورا دەنگ لەبانی بیەن، وەلێ ئەنجومەن نوێنەرەیل لە دانیشتن دەنگدان لەبان یاساگە شکست هاورد.

 حکومەت هەرێم کوردستان لە حوزەیران 2013 بڕیار دروسکردن پارێزگای هەڵەبجە دا ناوەندی شار هەڵەبجەس، و ئی قەزایەیلە کەفنە ناوی: هەڵەبجە، شارەزوور، پێنجوێن، سەید سادق. کە پەیوەندی وە پارێزگای سلێمانی داشتن، وەلێ تا ئیسە حکومەت فیدراڵی جویر پارێزگا ناوی نەچەسپانیە.