ئەمریکا ئاگادار عراق کەێد لەبان پشتگیریکردن حووسیەیل یەمەن
شەفەق نیوز/ سەرچەوەیلیگ ئاگادار، ئمڕوو دووشەممە، ئاشکرا کردن کە بیت هێگسیس وەزیر وەرگری ئەمریکا پەیامیگ ئاگادارکردن زبریگ ئەرا محمد شیاع سودانی سەرۆک وەزیرەیل عراق رەسانیە، ئەوەیش لە پەیوەندیکردن دویەشەو یەکشەممە وەگەردی.
سودانی، دویەکە یەکشەممە، پەیوەندییگ لە هێگسیس ئەرای هات، لەناوی باس هاوبەشی ستراتیژی ناوەین عراق و ئەمریکا کرد، و کرنگیەیل هاوبەش وە ئارامی و ئاسایش هەرێمی.
لەباوەت ئی پەیوەندیە، سەرچەوەیل ئەرا ئاژانس شەفەق نیوز وتن: هێگسیس ئاگادار سودانی کرد کە هەر دەسوەردانیگ لەلایەن باڵە چەکدارەیل عراقی، لەباوەت پەلامار ئەمریکا وەبان حووسیەیل لە یەمەن، هیلێد واشینتۆن وەڵامیگ سەربازی زویوەزوی لەبان ئەو باڵەیلە لەناو عراق بەێد، ئەراوە بایەسە نەهیلن هویچ دەسوەردانیگ هەکاتی ئەوەگ لە جەنگ لوبنان و غەززە بکەن.
سەرچەوەیل وتنیش: وەزیر وەرگری ئەمریکا دووپات لەبان سودانی کرد وە گرنگی زویوەزویکردن لە یەکلاییکردن باوەت بیچەککردن باڵە چەکدارەیل و کارکردن لەبان هەڵوەشیانیان، و دووپات کرد کە ئی باوەتە گرنگی گەورەیگ لەلایەن سەرۆک ترەمپ و ئیدارەگەی دیرێد، لە وەختیگ سودانی وت؛ حکومەت کار لەبان ئەوە کەێد و گفتوگۆ وەرد لایەنەیل چەکدار دیرێد ئەرا رەسین وە رێککەفتنیگ لەی باوەتە.
وەگورەی بەیاننامەی فەرمی عراقی، سەرۆک وەزیرەیل وەێک وەزیر وەرگری ئەمریکا، باس گەشەیل ئەمنی لە ناوچەگە کریا، وە تایبەت ئەوەگ پەیوەندی وە ئۆپراسیۆنەیل سەربازی لە یەمەن دیرن، و ئەو رەوشەیل جی نیگەرانییە لە سوریا.
وەزیر وەرگری ئەمریکا باس ئۆپراسیۆنەیل سەربازی لە یەمەن کرد، و وت: ئەمریکا ئەوەسا وەردەوام بوود لە ئۆپراسیۆنەیلی ئەگەر پەلامارەیل حووسی لەبان هیزەیل ئەمریکا نەوسیەنەو، و کاریگەری لەبان کەشتیوانی لە دەریای سوور، و دووپاتیش کرد کە واشنتۆن بەرزکردن جەنگ نیەخوازێد، و وەگەرد وسیان ئەو پەلامارەیلە ئۆپراسیۆنەیل سەربازی وسیەنەو.
وەگورەی بەیاننامەگە، سودانی دووارە دووپات لە پابەندبوین عراق وە مقیەتیکردن راوێژكارەیل هاوپەیمان ناودەوڵەتی لە عراق کرد، و دووپات لە پابەندبوین عراق وە هیشتن چەک لەلای دەوڵەت وە تەنیا و پاڵپشتیکردن ئارامی ناوخوەیی.
