ئەنجومەن دیالە عومەر کروی لاوەێد و نیزار لهێبی ئەرا سەرۆکایەتیی هەڵوژێد
شەفەق نیوز/ ئەنجومەن پارێزگای دیالە، ئمڕوو یەکشەممە، لەبان لاوردن عومەر کروی سەرۆکی لە دانیشتن پرسیارکردنی دەنگدا، و دەنگ ئەرا وەرگردن پۆستەگەی ولایەن نیزار لهێبی دا.
پەیامنێر ئاژانس شەفەق نیوز لە دیالە وت: ئەنجومەن دیالە وە فرەیی وە ئامادەبوین 11 ئەندامی دەنگ لەبان ئەوە دا کە دڵنیایی وە وەڵامەیل عومەر کروی سەرۆک ئەنجومەنەگە نەیاشتنە.
وتیش: دانیشتگە هەڵگریا، و ئەوەسا دانیشتنیگ ترەک ئەنجام دریەێد ئەرا لاوردن عومەر کروی لە پۆستەگەی و پەسەنکردن جیگریگ لە شوینی.
ئەنجومەن دیالە، لە دویای ئەو دانیشتنە، کوتپڕ دانیشتن نوویگ ئەنجام دا، و لەناوی دەنگ لەبان لاوردن کروی دا، وە شمارەی 12 ئەندام.
وەگورەی پەیامنێر ئاژانسمان؛ ئەنجومەنەگە دەر کاندیدکردن ئەرا پۆست پارێزگار واز کرد، ئەرا هەڵوژاردن کەسیگ لە جیای کروی.
پەیامنێرمان وتیش: دویای ئەوە، ئەنجومەن دیالە دەنگ ئەرا نیزار لهێبی دا تا بوودە سەرۆک نووی.
ئەنجومەن هەرێمەیل لە پەرلەمان عراق، ئمڕوو یەکشەممە، دووپات کرد کە دانیشتن پرسیارکردن سەرۆک ئەنجومەن پارێزگای دیالە یاسایی نییە، و لە بەیاننامەیگ دیاری کرد کە سەرۆک ئەنجومەن لە ئەرکەیلی وەردەوامە تا دادگا بڕیاریگ لەباوەت ئەو تانە دەرکەێد کە لەبان بڕیار لاوردنی پیشکەش کریاس.
دانیشتن پرسیارکردن ئمڕوو، دەمەقاڵیگ ناوەین عومەر کروی و تورکی جەدعان عتبی پرسیارکەری وەخوەی دی، مە بوخت ساختەکاری لە یەکیگ لە بڕیارە وەرینەیل ئەنجومەن وەپیا کرد.
