هەواڵی کوردستان ئێستا

شەفەق نیوز/ رووژنامەی فرانس پرێس فەرەنسا، رووشنایی خستە بان بازی زەڕەمشتەکی لە عراق، لە گفتوگۆ وەرد یەکیگ لە دیارترین بازیکەرەیل زەڕەمشتەکی لە وڵات، و باس نیاز پاڵەوانەیل زەڕەمشتەکی کرد لە هەناردەکردن بازیەگە ئەرا جیهان هەکاتی کار بەڕازیل وەرد بازی تووپان.

رووژنامەگە باس کرد کە لە شوینیگ پڕ لە مەردم لە بەغدای پایتەخت، وەگەرد دەنگ دهۆڵ مەردمەگە چڕن، وەلێ وە بازی تووپان نییە، بەڵکم بازی زەڕەمشتەکیە، کە ئی بازیە تەمەنی سەدان ساڵە، عراقیەیل لە مانگەیل رەمەزان وەیەکەو ئی بازیە کەن.

  رووژنامەگە لە زوان جاسم ئەسوەد پاڵەوان زەڕەمشتەکی کە ئیرنگە تەمەنی رەسیەسە سەرتای هەفتاگان، و سەرۆک یەکێتی نیشتمانیە ئویشێد: بازییگ کوینە و کەلتوریە، بازی باپیرەیلمانە کە عراقیەیل کەێدە یەکیگ.

رووژنامەگە وتیش: یەکیگ لە تیمەگە کلکوانە لەناو قەپاڵ یەکیگیان شارێدەو، و وەرپرس ئەو تیمەگە تەنیا 10 خولەک دیرێد تا بزانێد هاناو دەس کامیان، و زیاتر لە 500 کەس ئەرا بازیەگە ئامادە بوون، چ لە تیمەیل یا تەماشاکەرەیل، کە یەک بازی ناوەین کازمیەی بەغداد و ناسریەی زیقارە، و ئەوەکە ناوەین مەشتەل بەغدا و تیمیگ لە شار بەسرە.

رووژ دیاری کەێد کە گشت مەردمەگە نووڕنە ئەو چل کەسە لەناو یەی تیمیان، هەناێ لە ژیر پەتوو گردەو بوون تا کەس نەزانێد ئەو کلکوانە نریەێد ناو دەس کامیان، ئمجا وەرانوەر ئەو تیمەگە نیشتن، بەشیگیان چەو نویقان و بەشیگیان باوەش کردە خوەیەو، و وەرپرس ئەو تیمەگە خاس نووڕیە روخسار و رەنگیان تا مەزەنە بکەێد کلکوانە هاوەلای کامەیان.

وتیش: هەناێ لە مەزەنەکردن شکست هاورد و نەتوەنست کلکوانە لە مشت ئەو تیمەگە درارێد، تەماشاکەرەیل دەسکردنە هاوار.

وەرپرس تیم کازمیە باقر کازمی ئەرا ئاژانس فرانس پرێس وت: عراقیەیل لە گشتی فرەتر دووس بازی تووپان دیرن، و زەڕەمشتەکی لە پلەی دویەم تیەێد، چماێ هاناو خوینمان.

  رووژنامەگە وتیش: لە وڵاتیگ نزیکەی 400 تیم زەڕەمشتەکی دیرێد، ساڵانە لە جویراجویر ناوچەیل وڵات ئەو بازیە وەڕیەو چوود، کە پاڵەوان زەڕەمشتەکی وت: ئومێد دیرم رووژیگ بازیەگە بڕەسێدە دەیشت سنوور عراق، هەکاتی بەڕازیل لە بڵاوکردن بازی تووپان، ئیمەیش زەڕەمشتەکی بڕەسنیمنە گشت جیهان.