هەواڵی کوردستان ئێستا

شەفەق نیوز/ سایت خەوەری "بلۆمبێرگ" ئەمریکی، ئاشکرا کرد کە عراق تەقەلا دەێد پرس کەمدەسی کارەبا چارەسەر بکەێد، کە ئەوەسا لە ئەنجام سزایەیل ئەمریکا وەبان ئیران سەختەو بوود، ئەوەیش وە دانوسەنین وەرد کۆمپانیایل ئەرا دروسکردن دوو سەکوو بانئاوی لە دەریا، ئەرا ئەمارکردن و کلکردن غاز وەگەرد هاتن مانگ حوزەیران ئایندە.

ئەو راپۆرت ئەمریکیە کە ئاژانس شەفەق نیوز ئەڵگەردانی کرد وت: وەرجەیە لەی مانگ ئازارە ئەمریکا بڕیار دا وەخشین سەرۆکایەتی نووەو نەکەێد، کە ری وە عراق دیاد تا کارەبا لە ئیران بسینێد، یەیش لە چوارچیوەی زوورهاوردن وەلایەن ئیدارەی سەرۆک ئەمریکا دۆناڵد ترەمپ لەبان تەهران تا دانوسەنین بکەێد لەبان رێککەفتن ئەتۆمی نوویگ، وتیش؛ ئی گامە هیشت حکومەت عراق غازیگ فرەتر بخوازێد ئەرا جیوەجیکردن داوای زیای لەبان کارەبا.

  راپۆرتەگە باس وتارەیل حەیان عەبدولغەنی کرد، کە دویەکە یەکشەممە، وت: ئەو دوو سەکووە ئەوەسا لە نزیک بەندەر خۆر زوبیر لە بەسرە دروس کریەن.

وتیش: لەو قسەی وەزیرە ئاشکرا کرد کە عراق پشت وە بەرهەم ناوخوەیی غاز بەسێد ئەرا وەجیهاوردن نزیکەی 60% لە خوازینەیلی، لە وەختیگ هاوردەیلی بەش ئەو 40 %ەگەی کەێد، وەلێ لە مەوقەی لویتکەی وەکارهاوردن رەسێدە 50 %.

وەگورەی راپۆرتەگە، حکومەت عراق هەمیش کەمکردنیگ خستە وەردەس ئەرا دروسکردن سەکوویگ چەسپیای ئەرا دووارە کلکردن غاز لە بەندەر فاو گەورە، و عراق تەقەلا دەێد ئەو بڕە غازە کەمەو بکەێد کە وەبیخود سزیەێد، تا هاوردەی غاز کەمەو بکەێد، لە وەختیگ داواکاری بەرزەو بوودر و هەمیش خوازێد وەگەرد کۆتایی ساڵ 2028 وە تەواوی نەیلێد غازەگە بسزێد.

وتیش: دانوسەنین ناوەین عراق و ئەو کۆمپانیایل نەفتە کە لە هەرێم کوردستان کار کەن رەسیە نوا.