هەواڵی کوردستان ئێستا

پەلگ شەو

پەلگ شەو
پەلگ شەو

2020-05-19 00:00:00 - سەرچاوە: شـه‌فـه‌ق نيـوز

چەقو هابرویەدو جەرگم بڕیدەو

دەمم جوی کورپە لەو لیوەد بڕیدەو

بڕی گاوڵکی ها شویند بڕی دەو

لە نیمەو دو قسەی شیعرم بڕیدەو


بڕیدەو چوی لەدڵدا هات پەلگ شەو

پلەیگ وامو نزیکەو بوود پلەیگ شەو

سڕەو جوی ماسی بی ئاویگ پەلیگ شەو

وەهەرکو پل خوەم ئەو وەلما پلیگ شەو


پەلگ شەو من وە پرتەی چەو چنیمەی

خەوم جوی بەی لەتاریکی چنیمەی

چەنی سەرخوەش لەسای دیمەو چەنی مەی

لەنیمەی شەو نەزانستم چە نیمەی


چە نیمەی جام ژینم کرد چەپی هات

چمان پیری لەدوڕیانی چەپی هات

چەنی دەس راس لەلی گردم چەپی هات

دڵم گیرست ئەو هەڵپەڕکەو چەپی هات


چەپی هاتو وەگورمیچەی وەدەر دا

شەوم زوی چی دەری دارەو وەدەردا

وە سەوقاتی خوسەیلم هات وە دەردا

لەهەرکو دی خوەشی دیرم وەدەر دا


وە دەردا تو وتم ئەی شەو مڕا بەی

چەود جوی گورگ زگ ورسگ مڕا بەی

منو بەی بویم وتم بیلەم مڕا بەی

وەبی ڕا بیمە وەی دەردا مڕا بەی؟

 

مڕا بەی پیری مەرگم خەی ئەڕا کەی؟

دڵم بردی وەسیخ برشان ئەرا کەی؟

دەسد جوی شەن دڕا کردی ئەڕا کەی

وەبی پا راکەمەو شوینی ئە ڕا کەی


ئەڕا کەی شیشەی ژینم سەرەو خوار

شەوکیانی نەهاتو بووم سەرەو خوەر

وهەردگیان لەدەس دانام سەر و خوەر

چەبویشم ئەی شەو زاڵو سەرەخوەر


سەرەوخوارەو چەوم ها زەوی وەل ئیوەیل

گەزیم پەنجەی پەشیمانی وەل لیوەیل

وەشیوەی شیت کەی شیوەم وەلیوەیل

نە هەر تەنیا شکەنجەم دەین وەلی وەیل


وەلی وەیلی لە دوزەق کەی شەوانە

خوسەیلم ڕێننو شەو من شووانە

خوڕیگو نیەلیگەم بوینم شەوە نا!

لەناو ئاو گورز دەس قورسی شەوان نا

 

شەوانە یار بی دینم وتێد تیەێگ

وتم کەی شیتو زنهارم وە تیتگ

نەمەن بن جام خوەشیەیلم وەتی تک

بزانم جوی یەک تکەی واران وەتی تک


وەتی تک تک تکە پا دەم وەڕی تو

وەپەنجەم نەخش گوڵ کیشام وەڕوی تو

لەتو زیاتر کەسی نەیرم وڕید تو؟

وڕی تو دا وڕینەیلم وڕی تو

 

وەڕی تو چەن لەلیم پرسین چەمەو چەم

منو گوچان لفانەیمن چەمو چەم

گوڵی نەیرم وەبی خود من چمەو چەم

ئومیدی وەی شەوا نەیرم چمو چم

 

چمو چم تا چەنی ئویشن چەنی چەن

لەکورەو بویشمەو رایان چەنای چەن

تەمەن مفتە تەمەن بی یار چەنی چەن

چەنەی شەو وەل چەنەی دڵمەو چەنەی چەن.

کەنعان حاتەم موڕاد