هەواڵی کوردستان ئێستا

کوڵە چیرووک

رزا مەوزوونی/ خوەر ک ئاوا بۊ ساێقە شلاخەگەێ  تن‌ترەو کرد و هڕبیف، چمان کەێخوداێ ئابادی بۊ.

هەوا چۊنەو سەرد بۊ کە دەم و لۊتد چمان وە قەێ تنەو نەۊ.

وە قەوڵ "مەموو نامەت" گاجار بایەس دەس بەیدە  گووشەیلد تا بزانی هەسان!

مەشەی قەێتاس کڵاوەگەێ تا بان برۊەیلێ کیشاسە خوار و لۊتێ لە ژیر پەڕ پاڵتاوەگەێ شاردێیەسەو؛

وە دەنگێ گ چمان لە بن چاڵاوەو تێ ئۊشێ : "ئەێ کاول شەڕ بای ئەڕا کڕیوەد."

شەوە، دیەکەێ گواوڕ سەراێسەر لە وەفر پووشیاس. ئیمە لە دەور ئڵادینەگە نیشتیمنە و جوور ئێمامزاێەێگ ها ناوڕاسمان..

هڵم کتری سیەگە جوور تۊمەمارێ وەرەو هەوا چوود و سووز سەرما لە ژێر دەرەگەوا ملەجەریێیە گ باێدە ناو.

داڵگم جوور جاران شەوخەفەگان خەێدەو و کزەواێ سەردێ وە لاێ گوشمانەو وە بێکرچە ڕەێ بوود.

داڵگم لە لیمان پرسێ: "ڕولە سوو سات چەن ئەڕا مەدرەسە لە خەو هێزدان بێیەم؟"

هەر کام یەێ ساتێ ئۊشیم...

چەن گلە بەڕۊ لە بان ئڵادینەگە دێرن وە نەرم نەرم برشیەن..

شۊەڵەێ چراخەگە ورەو زەردی چوود..

هەرکام وە یەواش چیمنە ژێر لاف خوەمانەو..

م تا ئەورە گ تۊەنم لافەگە پێچنمە خوەمەو..

خەو دۊنم لە کۊەێ بەرزێ کەفمە خوار، هاوار کەم لە خەو هەڵسم، داڵگم ئۊشێ "بخەف ڕوەڵە سەرد لە بان سەرینەگە گەن کەفتۊ."

لە لاێ دەروەچەگەوا نووڕێدە دەیشت و وەل خوەێا ئۊشێد: "هێمان وەفر وارێ."

دجارە چەویلم بەسم و قۊتە بەمە ناو گەرمی خەوەو.

شەوەکی دەس داڵگم شانم لەقنێ: رووڵە هەڵەس سات هەفتە.

هەڵسم تواێ دەرە ئاسنی ژەنگ خواردێمان واز بکەم، واز نیەود!

دالگم ئوشێ : "ڕچگیاس، ڕچگیاس "

چم گووشت‌کوتەگە ک لە دوانزە مانگ ساڵ لە ماڵ ئیمە بێکارە تیەرم و وە دو تەقە دەر واز کەم.

وفر لە وارین واز هاوردێیە..

کۊچە تا ناوقەێ لە وەفر گوما بۊە.

لەناو کۊچە کڵاودەسماڵێ دۊنم ک گاجار دیارەو و گاجار لە وەفر گووما بوو. ئەو کڵاودەسماڵە ناسم، "خاڵوو ئاوەختی"ـیە.

منیش بێڵە کوڵگەێ دۊشکیایێگ هەڵگرم و  ڕۊ وە خاڵوو،  وفرەگان لاوەم و وەرەو نوا چم.

من و خاڵوو ئاوەختی، لەواێ سەردارەیل نواێ ئووردی لە یەێ کڕ ڕەسیمنە یەک، ڕیشێ کلاو دەسماڵ ئەۊ لە هەوا لەرزێد و پایل بێ‌جووراو م، لە زەۊ!.