هەواڵی کوردستان ئێستا

دویای فیلمەگەی نوح ساڵ ٢٠١٤ ، دەرهێنەر دارین ئاڕۆنوفیسکی تیەێدەو وەی فیلمە، ک فرەیگ هاوڕا نەوینە وه‌لیا، یا فرە خراوە، یا له‌ توکمەترین فیلمەگانیە.
هەرکەسیگ ئەو فیلمە دیە، زانێد ک فێڵە زوانەوانی و دیمەنەگانی نیمه‌ وه‌ختی داگیر کەێد، فرە لە گفتوگوه‌یل نادیار ونا ئاشکرا ، وفرە رەفتار چزدان و وێنەی شیواشیو هاتی، وەلی گشتی چەورەڕیە و خوازی بزانێد جشتیگ روودەێد، پێشبینی ئەوە کریەێد لە ری جوولەی نائارام کامیراگەی، یەکجا کامیراگە هاناو سنوریگ لەلی دەرنێەچوود، یەکجا کەفێدە شوون داڵگەگە لە پشتیەو، چمان کامیراگە بەسیاسە شانیەو، ولەچەن گرتەیگ چمان داڵگەگە کامیراگە گردیەسە دەسەو و تۆمار ئەرا خوەی کەێد.
فیلمەگە گشتی لەناو یەک شوون تەواوبوود، ناو ماڵیگ گومکەرە، ئەو ریە وەپیەو چید شایەت ئەرا خود شوونەگە بایدەو، ماڵەگە ئەرا فیلم ترسناک گونجیاگە، ماڵیگ کۆنە وفرە گەورا، چواردەوری باخچەس، ئەرا خیزان ئۆروستکڕاتی لە مێژوو کۆن کریاگە، ماڵەگە وەردەوام شیوەگەی ئاڵشت بوود، جوور ئاڵشبوی شیوەی گشت کەسایەتیەیل فیلمەگە، هرچەن ئەو ئاڵشبویەیلە لە شیوەی ماڵەگە لەبان دەس داڵگەگە بوود، ک جەخت خەێدە بان ئاڵشتکردنەوەی جوور هەوڵدانیگ ئەرا وەدەسهاوردن گیان ماڵەگە، ک ماڵەگە یەکیگە لە ئه‌كته‌ره‌یل سەرەکی لە چیرۆک فیلمەگە، تایبەت وەختا داڵگەگە بودە جوور بیگانەیگ لەچەو تەماشاکەر، هەنای لە ژوور خەفتنەگە نەخەفت، چوونکە ژوور خەفتنەگە بویە ماوایگ ئەرا مەردمیگ بیگانە.
فرە لە بۆچوونەگان، فیلمەگە (داڵگ) جوور دروشمیگ ئەرا زەوی دانا، وبڕیگ دیەی جوور ئاماژەیگ ئەرا مەریەم عەزرا، دوو میوانەگە (ئید هاریس) پیاوەگەس و (میشێل فایڤەر) ژنەگەس، جوور ئادەم و حەوا دیاردان، ک پیاوەگە یەکەمین هەڵە لە مێژوو کەێد، هەنای گەوهەرەگە شکنێد، ئیجا لە سەرسوڕی داڵگەگە ک خاوەن ماڵەگەس وشویەگەی ک شاعیریگە، هەردوگ کوڕه‌ میوانەگان تینە ناو ماڵەگە، ومرافەیگ ناوبەینان قومیەێد، تا یەکیگیان بوودە قوربانی، ک جوور هابیل و قابیل دیاردەن.