پلانيگ تيرۆريستى ئه‌را گرتنه ئامانج به‌غدا و كوردستان و چه‌ن پاريزگايگ شكه‌ست هاورد
شه‌فه‌ق نيوز/ سه‌رۆك شانه‌ى ئه‌لسقوور وه‌ڕيه‌وبه‌ر گشتى هه‌واڵگرى و دژه تيرۆر له وه‌زاره‌ت ناوخوه‌يى، ئاشكراى پويچه‌ڵكردن پلانيگ تيرۆريستى خه‌ته‌رناك كرد ك ريكخرياگ تيرۆريستى داعش وه نياز بويه له چه‌ن پاريزگايگ و له هه‌رێم كوردستان ئه‌نجامى بيه‌ێد، باس له‌وه‌يش كرد ئه‌و پلانه ئاشكرا كرياگه دوياى ئه‌وه‌گ شانه‌يگ تيرۆريستى له به‌سره ده‌سگير كرياگه وه‌ل ده‌سگيركردن دو تيرۆريست تر ك وه‌رپرسن له دوباره په‌يوه‌نديكردن و جموجويلكردن ئه‌را بان باقى داعشيه‌يل ك داوڕيانه‌و واينه له پاريزگايه‌يل رزگاركرياێ.
له‌ى باوه‌ته‌و، ئه‌بو عه‌لى به‌سرى له به‌ياننامه‌يگ با ئه‌و كرده‌وه‌ى هه‌واڵگريه ئه‌كا ك ئاژانس شه‌فه‌ق نيوز ئاگادارى بوى و وت: ئه‌و تيرۆريسته‌يله ك ده‌سگير كريانه، كاره‌يل تر له دژيان تۆمار كرياو به‌شدارى كردنه له كردوه‌يل تيرۆريستى دژ هيزه‌يل چه‌كدار و پێشمه‌رگه‌و حه‌شد شه‌عه‌بى و بازگه‌يش دانانه و پويل وه زوور له مه‌ردم وه‌رگرتنه‌و سزاى هاووڵاتيه‌يل دانه له‌وه‌ختيگ داعش له‌و ناوچه‌يله بويه ك ساڵ 2014 داگيريان كرد له نه‌ينه‌واو رومادى و سه‌ڵاحه‌دين.
باس له‌وه‌يش كرد له‌وه‌ر جيوه‌جيكردن فه‌رمانه‌يل مسته‌فا كازمى سه‌ركرده‌ى گشتى هيزه‌يل چه‌كدار و چه‌وديريكردن وه‌زير ناوخوه‌يى، شانه‌ى ئه‌لسقوور هه‌واڵگرى و وه‌ڕيه‌وبه‌رايه‌تى هه‌واڵگرى و دژه تيرۆر له وه‌زاره‌ت ناوخوه‌يى تويه‌نستن كاره‌يليگ نهێنى ئه‌نجام بيه‌ن و شكه‌ست وه پلانيگ تيرۆريستى بارن له‌ى دوياخره ك تواس به‌غداى پايته‌خت و گشت پاريزگايه‌يل و هه‌رێم كوردستان بگرێده ئامانج.