English | عربي

  ☵ گرنگترین هه‌واڵ



حەشدی شەعبی لە شنگال و سحێلا گەڕ بە کوردانی ئێزدی دەکەن

2019/03/17 | 16:45

(هەواڵ كوردستان)- 6 بازگەیان لە ناوچەكە داناوە

بەگوێرەی زانیاریی لایەنە بەرپرس و پەیوەندیدار و ئاگادارانی ناوچەكە، حەشدی شەعبی و حكوومەتی عێراق، چەندین خاڵی پشكنین و بازگەیان لە دەڤەری شنگال و سحێلا داناوە.

میلیشیاكانی حەشدیش لەو بازگانە، جگە لە بێزاركردنی هاووڵاتییانی کوردی ئێزدیی ناوچەكە، بەتایبەتی ژن و منداڵەكانیان، هاوكات ئەو ئێزدییانەش كە لە دەستی داعش رزگار بوونە و بەو بازگانەدا ڕەت دەبن هەراسان دەكەن.

لەم بارەیەوە، بەرپرسی لێژنەی ناوچەی پارتی لە شارەدێی سنوونێ بۆ (باس) ئاشكرای دەكات، كە ژمارەیەكی زۆری بازگە لەلایەن حەشدی شەعبی و حكوومەتی عێراقییەوە لە دەڤەری شنگال داندراون، هەر لە ڕەبیعەوە بگرە تا دەگاتە قەزای شنگال.

ئەو بازگانەش بە ئەنقەست خەڵكی هاموشۆكار و بەتایبەتی ئێزدییەكان، بێزار و هەراسان دەكەن.

ئێزدین شەمۆ، بەرپرسی لێژنەی پارتیی دیموكراتی كوردستان لە ناحیەی سنوونێ، ئاماژە بەوە دەكات، كە: "هەندێك لەو ئێزدیانەی لە ڕۆژانی ڕابردوو لە سووریا و لە دەستی داعش ڕزگار كران، لە كاتی گەڕانەوەیان بۆ شنگال و شادبوونەوەیان بە كەسوكاری خۆیان، لەو بازگانەی حەشدی شەعبی و حكوومەتی عێراق زۆر هەراسان كراون و ئاستەنگیان بۆ دروست كراوە".

شۆفێرێكی كوردی ئێزدی، كە لە هێڵی شنگال كار دەكات و سەرنشینان دەگوازێتەوە و نەیویست ناوەكەی ئاشكرا بكرێت، بە (باس)ی ڕاگەیاند: "لە سحێلاوە تا دەگەیتە شنگال، 6 بازگە داندراون ئەو بازگانە زۆر بێزارمان دەكەن، بەتایبەتی ئەو كاتەی كچ و ژنانی ئێزدیمان لەگەڵدا بێت.

ئەوانەی لە بازگەكانی حکوومەتیشدا ئەو خەڵكە هەراسان دەكەن، عەرەبە سوننەكانی ناوچەكەن".

ئەو شۆفێرە گوتیشی: "هەموو ئەوانەی كە لە بازگەكانی حكوومەتدا خەڵكی هاموشۆكار و بەتایبەتی ئێزدییەكان هەراسان دەكەن، ئەو عەرەبە سوننانەن، كە پێشتر و لەو كاتەی ساڵی 2014 داعش ناوچەكەی داگیر كرد و ئەو كارەساتەی بەسەر كوردانی ئێزدی هێنا، بۆ خۆیان، یان كەسوكاریان هاوكاریی داعشیان كرد و بەشیكیشیان لە تاوانكردن بەرامبەر ئێزدییەكان بەشدار بوون و ئێستاش لە ناوچەكە دەسەڵاتدارن".

شۆفێرەكە دەشڵێت: "جگە لە ئێمە، شۆفێری عەرەبیش لەو ڕێگایەدا كار دەكەن و سەرنشینانی عەرەب دەگوازنەوە، بەڵام بۆ تەنیا ڕۆژێكیش نەماندیوە بازگەكان ڕایان بگرن، یان كێشە و ئاستەنگیان بۆ دروست بكەن.

كەچی ڕۆژانە بەر بە ئێمە دەگرن، بەتایبەتی كاتێك لە ناسنامەكەدا بزانن سەرنشینێكمان ئێزدییە، ئەوا بەتەواوی هەراسانمان دەكەن.

خەڵكەكەیش لەو رەفتارە نەك هەر نیگەرانن، بەڵكوو ترسیشیان هەیە".

شۆفێرە کوردە ئێزدییەكە بە جۆرێك لە بێزاری گوتیشی: "بەڕاستی بەدەست ئەو بازگانەوە گیرمان خواردووە و تەواو بێزار بووین" و جەختیش دەكاتەوە كە: "ئێمە كە لە شنگالەوە، یان لە مووسڵەوە سەرنشین دەبەینە بەغدا، ئەگەرچی بازگەكان هەموویان دەزانن كە ئێزدین، بەڵام نە داوای ناسنامەمان لێ دەكەن و نە بێزاریشمان دەكەن، بەڵام كە لە دهۆكەوە و بە ڕێگای سحێلادا دەچینە شنگال و هەفتە هەیە دووجار سەرنشینمان دەبێت، تەشقەڵەی زۆر بە خۆمان و سەرنشینەكانمان دەکەن و ئاستەنگمان بۆ دروست دەكەن، هەر ئەمەشە وای كردووە، كە خەڵك تەنانەت بۆ سەردانیش نەچێتەوە شنگال و دەڤەرەكە".








نیشانەکردن



زۆرترین






ڤیدیۆ- وێنە





Trending