هاوپه‌یمانى ده‌وڵه‌تى یاسا رایگه‌یاندوه: چوارچێوه‌ى هه‌ماهه‌نگى له‌هه‌وڵدایه بۆ ئه‌وه ماوه‌ى دیاریكراو بۆ هه‌ڵبژاردنى سه‌رۆك كۆمار تێنه‌په‌رێنرێت وله‌كاتی خۆیدا ئه‌و پرسه یه‌كلایى بكرێته‌وه.
وائیل روكابى، ئه‌ندامى هاوپه‌یمانى ده‌وڵه‌تى یاسا رایگه‌یاندوه: تایبه‌ت به‌پرسى سه‌رۆكایه‌تى كۆمارى عێراق، چوارچێوه‌ى هه‌ماهه‌نگى هه‌وڵده‌دات ماوه‌ى ده‌ستورى ئه‌و بابه‌ته له‌كاتی دیاریكراوى خۆیدا بێت وله‌وه زیاتر تێنه‌په‌رێنرێت.
ئاماژه‌ى به‌وه‌شكردوه: كاتژمێره‌كانى داهاتوو پێده‌چێت دۆسیه‌ى سه‌رۆك كۆمار به‌ر له‌پێشێلكردنى بریارى دادگاى ئیتیحادى یه‌كلاییبكرێته‌وه.
روكابى گوتیشى: چوارچێوه‌ى هه‌ماهه‌نگى هه‌وڵده‌دات رۆژى شه‌شى نیسان به‌بێ یه‌كلاكردنه‌وه‌ى پۆستى سه‌رۆك كۆمار ده‌رباز نه‌بێت، به‌تایبه‌ت له‌گه‌ڵ لایه‌نه‌كانى ناكۆك، ئه‌مه‌ش به‌ئامانجى پابه‌ندبوون به‌واده ده‌ستورییه‌كان.
ئاماژه‌ى به‌وه‌شكردوه: له‌ئێستا دا جوڵه وهه‌وڵه‌كان له‌زیادبووندان بۆ ئه‌و پرسه، و 24 كاتژمێرى داهاتوو كه‌له‌لایه‌ن دادگایى ئیتیحادییه‌وه دانراوه بۆ ئه‌وه‌ى له شه‌شى نیسان كۆبوونه‌وه‌ى په‌رله‌مان بۆ هه‌ڵبژاردنى سه‌رۆك كۆمار له‌كاتى دیاریكراوی خۆیدا ئه‌نجامبدرێت، وپێده‌چێت گۆڕانكارى زۆر له‌وبواره دا ببیندرێن.
گوتیشى: ئه‌گه‌ر هاتوو دۆسیه‌ى سه‌رۆك كۆمار سبه‌ى یه‌كلانه‌كرایه‌وه له‌ماوه‌ى دیاریكراو دا، چوارچێوه‌ى هه‌ماهه‌نگى پابه‌ند ده‌بێت به‌و بریاره یاساییانه‌ى كه‌تایبه‌تن به‌ماوه‌ى ده‌ستورییه‌كه‌ى، ودادگایى ئیتیحادیش ئه‌و كات هه‌ڵوێستى خۆى ده‌بێت.