ریخ برایی

لە دەم‌ئیوارەیگ، بزان و مەزان، لێڵە زەمین گرتۊد..

هوونکی ئێوارە، پسا لە گەرما زوور سەن و نەرمەتووزێگ لە شوون ڕیەن و شەن‌خەرمان، ئاسمان گوند هەفت‌کانی داپووشاۊد...

ماشینێگ، وەنەرم لە جادەی ئاوای لا گرت و لە رێوارێ پرسیار کرد:

مال مەشەی‌ فەرمان کامێیانە!؟

رێوار دەس وەرەو تەنیا ماڵ بەرزای چگای جەهانشا دریژ کرد...

ماشین نزیک کرد و دو پیای میانەساڵ لە ماشین داوەزیان...

باوگم لە بان سەکوو دەرماڵ هڵاژیاۊد، لە دەنگ دو پیای هێز گرت و وە پای پەتی لە سەکوو هاتەو خوار...

-خوەش هاتینە، پادان وەبان چەو...

یەکێگ لە پیاگان وەت:

کەێخودا پەێخامێگ ئەڕاد دێرم!

باوگم وەت: یا خودا خەیر...

پیای لە بن گووش باوگم چشتێ وەت و فچەفچێ کرد...

باوگم هەوڵ بۊ و وەت: هەێ ماڵم بڕمێ، سۊنم بشکێ...

بزۊزگە چێیە گیانم، بەڵام وە داتەک گەورا و بۊچگی، پرسیار نەکردم...

تەنیا دیم ک باوگم هەر دو پیای بردە ناو ئەمار ناو هسار و شەش گونی ئارد بار کردن و ماشین خڕێ خوارد و بوقێ دا و لە چەو ئاوا بۊ...

دجارە لە وەرەیوان نیشتیم و پسا شام خواردیم، باوگم وەت:

پیای گەوراێگ، لە کەڵکوش، هەر جوور برامە، رێخ برای نایمەسە چاڵ...

نیەزانم چۊ کەمدەسەو بۊە، ئەو دو پیاێە، پەێخام ئەۊ هاوردۊن، وەتۊد نان لە ناو مناڵم نییە...

رووژەیل جۊر شەماڵەێ وا هاتن و چێن..

 رۆژێ لە ئاوای سەرمەس، باوگم دەس کردە مل پیاێ باڵابەرز سێوڵیێگ، خەنسن و کەیفخوەشی کردن...

باوگم وەت: برا کەمم وە فرە بزان، وە گیان ئی کوڕمە، هەیشت گونی ئارد داشتم، شەشێ ئڕا ت کل کردم...

پیای وەت:

کەێخودا! تن خودا گەپ چوە دەی!؟ ئارد چوە!؟

باوگم وەت: کەسێگ پەێخام جنابت هاورد و چشتەیلی وەت کە ئاگر گرتم...

پیاێ باڵابەرز وەت:

ماڵم بڕمێ، گووڵد دانە، شەش برام بمرێ، رووحم خەوەر نەێرێ!!

باوگم زەردەخەنەێگ کرد و وەت:

شکر خودا ئەڕا ئەو درووە!

بوو کزوکەواو، شار سەرمەس داپوشاۊد، لە بان کەچەڵ‌کۊە، خوەر پسا هشار بۊ...

نۊسەر: دوکتور فەرهاد عزەتیزادە