دهۆكێ به‌رهه‌ڤى بو هاتنا گه‌شتیارێن سه‌رێ سالێ كریه
بو هه‌ر رۆژه‌كێ جهێ ڤه‌حه‌واندنا 15 هزار گه‌شتیاران هه‌یه
ژبوى ئاماده‌كارى ژ بو شه‌ڤا سه‌رێ سالا نوى یا (2020)، رێڤه‌به‌ریا گه‌شت و گوزارا دهۆكێ ژلایێ خو ڤه ده‌ست ب چه‌ندین ئاماده‌كاریان كریه و پێشبینى دكه‌ن هژماره‌كا زور یا گه‌شتیاران ژ ده‌رڤه‌ى سنورێن هه‌رێمێ قه‌ستا باژێرێ دهۆكێ بكه‌ن.
رێوار محه‌مه‌د ره‌شید، ژ راگه‌هاندنا رێڤه‌به‌ریا گشتى یا گه‌شت و گۆزارا پارێزگه‌ها دهۆكێ د داخویانیه‌كێ دا بو (باسنیوز) دا دیاركرن: "مه وه‌كو رێڤه‌به‌ریا گه‌شت و گوزارا پارێزگه‌ها دهۆكێ چه‌ندین رێكار گرتینه به‌ر ژ پێخه‌مه‌ت هاتنا گه‌شتیاران بو هه‌رێما كوردستانێ ب گشتى و پارێزگه‌ها دهۆكێ ب تایبه‌تى و ئه‌و گه‌شتیارێن قه‌ستا دهۆكێ دكه‌ن (70%) خه‌لكێ باشور و ناڤه‌راستا عیراقێ نه كو ب رێكێن به‌غدا و مووسل قه‌ستا دهوكێ دكه‌ن و (30%) ژى خه‌لكێ باكورێ كوردستانێ و تۆركیا نه ك وب رێكا هه‌ردوو ده‌رگه‌هێن سنورى یێن (سه‌ر زێرى و ئیبراهیم خه‌لیل) دگه‌هنه پارێزگه‌ها دهوكێ".
گوت ژى: "ژ پێخه‌مه‌ت كێشانا سه‌رنجا گه‌شتیاران رێڤه‌به‌رێ گه‌شت و گوزارا دهۆكێ دگه‌ل چه‌ندین جهێن ڤه‌حه‌واندنا گه‌شتیاران كومبویه دیسان ئه‌و جهێن ئاهه‌نگێن شه‌ڤا سه‌رێ سالێ لێ دهێنه ئه‌نجام دان ناڤبرى داخاز ژێ كریه كو ب هه‌مو شیان ڤه وان جهان ب جوانى ب خه‌ملینن تا كو رێژه‌یه‌كا باش یا گه‌شتیاران قه‌ستا پارێزگه‌ها دهۆكێ بكه‌ن".
دوپاتیێ ل سه‌ر وێ یه‌كێ ژى دكه‌ت: "هژماره‌كا ئێكجار زور یا ئوتێل و موتێلان د به‌رهه‌ڤن پێشوازیا گه‌شتیاران بكه‌ن و بو هه‌ر رۆژه‌كێ جهێ (15) هزار گه‌شتیاران ل دهۆكێ هه‌یه وئه‌گه‌ر ئه‌ڤ رێژه‌یه بلند بو و به‌ره‌ڤ زێده‌بوونێ ڤه چوو ، مه جهێ یه‌ده‌ك ته‌رخانكریه بو گه‌شتیاران و ب هه‌مو شیان ڤه مه كار كریه ژ پێخه‌مه‌ت كێشانا سه‌رنجا گه‌شتیاران تا كو به‌رده‌مام قه‌ستا هه‌رێما كوردستانێ و پارێزگه‌ها دهۆكێ بكه‌ن".
