سوودانی و عەبدوڵڵای دووەم کۆبوونەوە
دیجیتاڵ میدیای سپێده
سەرۆکوەزیرانی عێراق، محەمەد شیاع سوودانی و شای ئوردن، عەبدوڵڵای دووەم پتەوترکردنی ھاریکارییە ھاوبەشەکانی نێوان ھەردوو وڵاتیان تاوتوێ کرد.
نووسینگەی راگەیاندنی سەرۆکوەزیرانی عێراق لە راگەیەندراوێکدا ئاماژەی بەوەداوە کە محەمەد شیاع سوودانی لە پەراوێزی بەشداریکردنی لە دووەمین کۆنگرەی بەغدا بۆ ھاریکاری و ھاوبەشیی لە عەممان لەگەڵ شای ئوردن، عەبدوڵڵای دووەم کۆبووەتەوە.
راشیگەیاندووە کە لە میانی کۆبوونەوەکەدا، پتەوترکردنی ھاریکارییە ھاوبەشەکانی نێوان عێراق و ئوردن لە بوارە ئابووریی و بازرگانییەکاندا تاوتوێ کراوە.
باسی لەوەش کردووە کە گفتوگۆکراوە لەبارەی ژمارەیەک پرسی ھەرێمیی و نێودەوڵەتیی، ھەروەھا باس لە رۆڵی سەرەکی عێراق لە ناوچەکە و پەرۆشی بۆ ھاوکاریکردن لەبواری بەھێزکردنی ئاسایشی ھەرێمیی و سەقامگیریی ناوچەکە کراوە.
بەیانی ئەمڕۆ سێشەممە، سەرۆکوەزیرانی عێراق، محەمەد شیاع سوودانی بەمەبەستی بەشداریکردن لە دووەمین کۆنگرەی بەغدا بۆ ھاریکاری وھاوبەشیی گەیشتە ئوردن.
ئەمرۆ، دووەمین کۆنگرەی بەغدا بۆ ھاریکاری و ھاوبەشیی لە ئوردن ئەنجام دەدرێت کە تیایدا پاڵپشتیکردن لە سەروەریی عێراق و ئاڵنگارییەکانی بەردەم ئاسایشی خۆراک، ھەروەھا ئاسایشی وزە لە ناوچەکە و جیھان تاوتوێ دەکرێن.
