هەواڵی کوردستان ئێستا

شەفەق نیوز/ ژنیگ میسری، دویای توومەتبارکردنی وە ژەهرخوەرکردن و کوشتن شویەگەی، و دەرچگن فەرمان وەسێدارەدان لەبانی، و واژووکردن فەرمانەگە وەلایەن موفتی کۆمار، وەرجە جیوەجیکردن وەسێدارەدانی وە گڕیگ، لەمەرگ قورتار بوی، و خەڵک ئاوایەگەی، هەکاتی فیلمەیل سینەما، وە سویر و ئاهەنگ و دهوڵ پیشوازی لە گلەوخواردنی کردن.

 وەرجە ٦ ساڵ، کەریمە عەبدولحەمید یوسف، لە پارێزگای دەهلەقیە باکوور پایتەخت میسر، وە توومەت کوشتن شویەگەی وە ژەهر، دەسگیر کریا، و دادگای نەهیشتن تاوانەیل فەرمان وەسێدارەدان لەبانی دەرکرد.

ئەو ژن توومەتبارە پڕتاڵ سوور پووشێد، و نیشتە چەوەڕی مەرگ پەت سێدارە، باوجی پارێزەرگەی توەنست بەڵگەیل نوویگ بەخەێدە وەردەس دادگا،  وتا چوار ساڵ، ئەو ژنە لەناو زیندان، لەناو مردن و ژیان مەن، تا ئەوەنە بڕیار بیگوناهیی دەرچگ.

وەگورەی میدیایل میسری، ک ئمڕوو پەنجشەممە باس کردن ک ئەو بەڵگەیلە بیگوناهی ژنەگە چەسپانن، ک ئاشکرای ئەوە کردن ک ئەو مەوقە ک گوایە ژنەگە ژەهر داسە دەرخواردی، پیاوەگە لەو مەوقە لە ماڵ دەرچگە و تەندروسیی خاس بویە، ئیجا نیشتە ناو چایخانەیگ لە ئاوایەگە، و تا وەخت فرەیگ لەناو چایخانە بویە، و لەڕی گلەوخواردنی ئەرا ماڵ، کەفت و گیانی لەدەسدا.

 وەگورەی ئەو باسە ک هیشت بیگوناهی بکەفێدە بەش ژنەگە، شویەگە لە دەیشت ماڵ ژەهر خواردیە، و ئەوەیش لە مەوقەی دانیشتنی لەناو چایخانە بویە، ئیجا ژەهرەگە لەناو لەشی گەردیە،  وەرجەیەگ بڕەسێدە ماڵ، واتە ژنەگە ژەهرخوەری نەکردگە، و ژنەگەیش ئەو مەوقە هەر لەماڵ بویە.