هەواڵی کوردستان ئێستا

شەفەق نیوز/ نێچیروان بارزانی سەرۆک هەرێم کوردستان، ئمڕوو چوارشەممە، سڵاو لە ژنەیل کوردستان کرد، وە بوونەی رووژ جەهانی ژن، و جەخت لە گرنگی ئەوە کرد ک ئامادەبوینیگ گەورەتر شانوەشان ژنەیل جەهان بیاشتان.

بارزانی لە بەیاننامەیگ رەسیە ئاژانس شەفەق نیوز، گەرمترین پیرووزبایی لە گشت ژنەیل کوردستان و عراق و جەهان کرد، و ئومید پیشکەفتن و گورجی و وەردەوامی زیاتر ئەرایان خوازێد.

وتیش: لە ساڵەیل درویژیگ ژنەیل لە گشت چینەیل رەنج دەن، وەخاتر مسۆگەرکردن ماف شەرعی خوەیان، و کۆتاییهاوردن وە ستەم و تونوتیژی و دژایەتەی نایەکسانی.

وتیش: جویر ئەوەگ لە جاران پاڵپشتییان لە چین چاکسازی یاسایی و سیاسی و کۆمەڵایەتی و سەروەخوەیی دارایی و پەروەردە کردیمن، هەمیشە لە پاڵپشتیکردن رەنجیان وەخاتر مسۆگەرکردن گشت مافیان وەردەوام بویمن. 

سەرۆک هەرێم کوردستان وتیش: هویچ کۆمەڵگایگ ئازاد نییە، و هویچ کۆمەڵگایگ نیەتوەنێد پیشکەفێد ئەگەر ژن لەناوی ئازاد نەوود، وتیش: ئەراوە کار ئەرا ریوازکردنیگ فرەتر لە نوای بەشداریکردن ژن لە ژیان سیاسی و ئیداری و گشت چینەیل کەیمن، و کۆتاییهاوردن وە تونەڕەوی و دەسدرویژی لەبان ژن و مافەیلی.

لەی باوەتە، بارزانی دووپات لە خوازین هەرێم کوردستان ئەرا کار و سیاسەت و ستراتیژیای نوویگ کرد ک گشتی لەناوی بەشداری بکەێد، و پەروەردە و فێرکردن و پیشکەفتن لە چینەیل تۆێژینەوەی ئاکادیمیایی و زانستی و هوشیاری و گفتوگۆ فرە لایەن وە خاسترین ری دریەێدە قەڵەم ئەرا رەسین وەی ئامانجە.

 وتیش: سڵاو و دەسخوەشی لەو خانمەیلە کەم ک بڕوا وەخوەیان داشتن و لە جویراجویر مەیدان و چینەیل ژیان پیشکەفتن، و هەسی خوەیان لەناویان چەسپانن، و سەرکەفتن لە جیوەجیکردن ئەرکەیلیان وە بار کارەیلیان هەڵسیان و بوینە خاوەن ناویگ لەو کارەیلە. 

باس گرنگی ئەوە کرد ک بایەتە ژنەیل کوردستان شان وەشان ژنەیل جەهان ئامادەبوین و بەشداریکردن لە باوەتەیل ژن و ئەو باوەتەیل ژیان بیاشتان.

وەی بوونە، نێچیروان بارزانی وەبەرزی نرخدار کار و خەبات ژن کوردستانی لە ریخریاگەیل حکومەتی و ناحکومەتی و لە فەرمانگە و دامودەزگایل کرد، وتیش؛ وەچەو رێز و سوپاس نووڕیمنە رەنج و تەقەلای ئەو ژنەیل زڕنگە ک کار لە هەر کەرتیگ گشتی و تایبەت کەن و دەور گورجیگ لە وەڕیەوبردن و بیناکردن کۆمەڵگا و وڵاتەگە دیرن. 

بارزانی سڵاو لە گیان پاک ئەو ژنەیلە کرد ک گیان خوەیان کردنە قوربانی ئەرا یەکسانی و وەدەسهاوردن ماف ژن و ئەوانەگ بوینە قوربانی تونوتیژی، رەوانیان شاد بوود و یادیان خوەش، و لە کۆتایی بەیاننامەگەی وت: پیرووزی ئەرا ساڵیاد هەیشت ئادار، رووژ جەهانی ژن.