بەشیگ لە ژیاننامەی شاعر گەورەی کورد ئیلامی غوڵامڕەزا ئەرکەوازی
لە خێڵ میەسم (١٨٤٠ - ١٧٧٥) لە ناو مەردم وە غوڵامڕەزاخان ئەرکەوازی و غوڵامڕەزا ئەرکەوازی ئیلامی ناسیایە، لە بڕێگ لە شعرەیلێ نازناو «غوڵام» وەکار بردێیە.
ساڵ (1770ز) لە ئاوای "بانووزە" ک بەشیگە لە ناوچەی "سەرچەفتە"ی سەر وە شار چەوار ئیلام هاتێیەسە دی.
(ئەڵبەت ساڵ پێیابوین و مەرگێ خاس رووشن نییە)
شوین وەدیهاتن شاعر نزیک سنوور عەراق ئێرنگەس، دەیشتێگە ک کویەیل "باوەیاڵ" و "سەروێشە" و "ھانی سەونز" و "بەلەوان" دەورێ دانە.
غوڵامڕەزا لە بنەماڵەیگ خوەنەوار و دەوڵەمەن و دەسبچوو کورد پەروەردە بویە، حەسەن بەگ باوگێ مەلا و خاون دەس و قەڵەم بویە.
غوڵامڕەزا لە سەرەتا، قورئان خوەنین لە باوگێ هووکارە بویە و لە قوناغ ناوەینی ژیان خوەنەواریێ، فرە سەردان نەجەف و کەربەلا کردێیە، و زانستەیل ئایینی و خوداناسی(عیرفانی) و هسارەناسی و فەڵسەفە یای گردیە، ئەمان لە مەکتەوەیل فەرمی دەزگایل زانستی نەجەف و کەربەلا نەویە.
غوڵامڕەزا دویەتیگ قەوم خوەی خوازییە ک لەیوا ک دیارە چمان ئامووزای بویە ک دوو کوڕ لە لێ داشتێیە، یەکێگیان ناوی محەمەدڕەزا بوبە و ئەوەکەیش ئەحمەدخان.
ئەحمەدخان لە جەوانی لە دنیا چییە، و شاعیر ماتەمنامەیگ ئەرا مەرگ ئێ کوڕێیە وەتێیە.
غوڵامڕەزا ئەرکەوازی ماوەیگ خەریک کاروبار سەرووکایەتی خێڵ خوەی بویە.
