چیرووک ژیان
لەبان ئێ هەسارە سەر سەوزە گشت زینەوەریل رۆڵیگ گرنگ داشتن لە تووڕ ئاڵۆز ژیان بان هەسارەگە، رەنگینی سروشت وە دارسانەیل گەش و زەریا فراوانەیلی و دیمەنەیل زینگ، سەمفۆنیای رەنگ و شیوە و فۆرمەیل بوین، هەر جویریگیان وە شیوەیگ ناوازە خوەی وەگەرد ژینگە گونجانوێد و رۆڵ گرنگ داشت.
تا ئەو رووژەی بونەوەریگ نوو وەبان ئێ هەسارە ئارامە دروسبوی بوونەوەیگ کە گشت تواناییگ وەپی بەخشریا، زەوی هەم دڵخوەشبوی لە زیایبوین بوونەوەریگ نوو لەباوەشی و هەمیش خوڕپەیگ لە نارامی نیشتە دڵی لەوەر تواناگان ئێ بوونەوە رخیگ لەلای دروسبوی، ئەو بوونەوەرە ناوی مرۆڤ بوی!.
وەگەرد هاتن مرۆڤ ئاسمان کەو لە خوەشی دەس وە گیرستن کرد ئەسرەیلی بوینە پرزە واران و وارین خوەر لەپشت ئەورەیلە سەر دراورد و زەڕینە و سیمینە دروسکرد ئەرا پیشوازی و پەپوولەیل دەسکرد وەسەماکردن و گوڵەیل بوونەیل خوەش بڵاوکردن و درەختەیل خوەیان کردن وە پەناگە و سایەی بان سەر بوونەوەرە نووەگەو وە میوەیل تام خوەش خزمەتی کردن.
وەگەرد خزمەتکردن ئی بوونەوەرە ئەویش دەسکرد وە نیشاندان زوور بازوو خوەی و فیشاریگ بی ئەندازە خستە بان زەوی و دەسکردە چالاکیەیلی و توانا و مێشکی وەکارهاورد لە وەرەو نوا بردن ژیان، نوا بردنیگ کە زەرد وە ناسکی و گشت سیما رەنگینەیل زەوی رەسنێد.
هەر لە بڕین دار و دارسان و کوشتن ئاژەڵەیل بانی و پیسکردن کەشوهەواگەی دەسوەپیکرد وە پیشەسازی تا تێکدان ژیان کۆمەڵایەتی وەبانی.
ئێ بوونەوەرە خوەی پەیوەنی کۆمەڵایەتی و بەها کۆمەڵایەتەگان بان زەوی تێکدا، هەر خوەیشی هات لەری توانا بێ سنوورەگەی تووڕەیل کۆمەڵایەتی دروسکرد کە بویە بەڵا وەبان مرۆڤەیل نەزان و بیچارە، بوینە ویلکان خەیمە شەو بازی وەناو تووڕەیلی.
بەدی مرۆڤ وەبان زەوی لە نەبوین هاوسۆزی و بەزەیی و رێز لە کەرامەت و ماف سرووشت گشت بوونەوەرەیل سەرچەوە گرد، سەرچەوەی گرنگی نەدانە وە یەکتری و گرێدان ژیان وە دەرئەنجامەیل کردەوەیلمان لەبان هەسارەگە و نەوەیل ئایندە.
چارەسەرکردن بەدی مرۆڤ لەبان زەوی هەوەجە وە کردەوەی وە کۆمەڵ و لێپرسینەوە و پابەندبوین وە دادپەروەری و یەکسانی و بەردەوامیی کەێد.
وە ئەوزەڵداین وە بەهایەیل هاوسۆزی و میهرەبانی و وەرپرسیارەتی کۆمەڵایەتی توەنیمن وەرد یەکتر کاربکەین ئەرا کەمەوکردن زیانەیل، و دروسکردن جەهانیگ دادپەروانەتر و وە بەزەییتر ئەرا گشت لایگ.
