وە خەرج 5 ملیار... ئامادەکارییگ بیوینەی عراق لە مەرز زورباتیە ئەرا پیشوازیکردن لە زیارەتکەرەیل ئیرانی لە چلەی ئیمام حسێن
ئەندامیگ ئەنجوومەن پارێزگای واست، عادل ئەلبەدراوی، دووپات کەێد کە “کارکردن لە مەرز زورباتیە وەردەوامە، و پیشکەفتن وەرچەویگ لە کارەگە بویە، ئومید دیریمن وەرجە زیارەت ئەربەعین گشت کارەیل تەواو بکەیمن گەراج دەیشت کەمپ گومرگی و دەروازەی سنووریش ئامادەکریاس ئەرا وەرگردن ماشینەیل، ئەراوە سەردانکردن ئمساڵ خاسترە لە ساڵەیل گوزەشتە، کە ئاست کارکردن فرە خاسە و وەگورەی مەوقەی دیاریکریای ئەنجام دریەێد”.
بەدراوی ئەرا ئاژانس شەفەق نیوز وتیش؛ “لەباوەت ری دەرەکی بەدرە – کوت و بەدرە – دبونی وەیەکەو بەسیەن، کار لەلییان وەردەوامە، و بڕیاربوی لەبان بودجەی زیارەتکەرەیل لایەن دویەم هاتوچو لەبان ری دبونی جادە دروسبکریەێد. و ئەرا خاسەوکردن جادەیش و وەتەواوی رویپووشکردنی، بەڵام لەوەر ئەوە ئی کارە دویاکەفت، پارێزگاگە پەنا وە چارەسەری وەختانەی ریوبان برد، و ئیرنگە کار لەبان ری بەدرە-دبونی وەردەوامە، هەمیش لەبان ری بەدرە-کوت، و ئومید خوازیمن لە ماوەی دوو هەفتەی ئایندە گشت ئی کارەیلە تەواو بکەیمن”.
بەدراوی وتیش: “لە بەشیگ ناوچەی نزیک بەدرە گیچەڵ هەس، و وەگەرۆ پارێزگار واست محمد مەیاحی لەی باوەتە قسە لەبانی کریا ئەرا قیرتاوکردن ئەو ناوچەیلە کە زیان لەلییان کەفتیە، و ئومید دیریمن وە زویترین وەخت یە وە ئەنجام بڕەسنیمن. ”
ئامادەکاری بیوینە
لای خوەیەو، جەعفەر عەبدولجەبار محمد، سەرۆک شارەوانی قەزای بەدرە لە پارێزگای واست، باس ئەوە کەێد کە “وەڕێوەبەرایەتییە ناوەندییەیل ناو پارێزگاگە و لە قەزاکە دەس کردنە وە ئامادەکردن داتای تەواویگ ئەرا دەروازەی سنووری زورباتیە وەرد ئیران،و بڕە پویلیگ زیاتر لە 5 ملیار دینار ئەرا ئەو شوینە خەرج کریاس ئەرا تەواوکردن ژیرخانەگە، کە پارێزگار واست محەمەد ئەلمەیاحی رینمایی کرد کە گشت کارەیل ناو ئی مەرزە لە 5 ئاب ئایندە دیرتر نەکەفێد.”
محمد ئەرا ئاژانس شەفەق نیوز دووپات کرد کە “ئیرنگە کارەبا 24 ساعەت لە مەرزەگە هەس، و کۆمپانیایگ پاککەردن هەس کە وەخود شیوە لە گشت رووژەگە کار کەێد و پانکەی تەم و قەواسە لەسەدا 95 تەواو بویە، و سەردەوکردنیش لە پرۆسەگە ها ئاست تەواوکردن و گەراجەگەیش هەس، و وەسوبێس پووشیاس، بەڵام ئەنجومەن وەزیرەیل بڕیاردا کە گەراجەگە ڕێکوپێک بوودر بەڵام لەوەر نزیکەەوبوین بەروار زیارەت، ئی گەراجە تەواو نیەوود ، و تەقەلا دەیمن کارەیل کاستینگ و کارەیل ترەک تەواو بکەیمن، بەڵام ئەو کارەیل، لەوانەیش شوینەبل تەندروسی و قەواسە، لە زیارەت ئمساڵ تەواو نیەوون”.
لە ناو ئامادەکارییەیل، سەرۆک شارەوانی قەزای بەدرە ئویشێد: “هەماهەنگییگ بەرز لە ناوەین پارێزگای واست و پارێزگای ئیلام ئیران هەس، کە تا 60%ی زیارەتکەرەیل ئیرانی لە ئیلامەو تیەنە ناز و لە ری دەروازەی میهران ئیرانەو ئەرا نەرۆ سنووری زورباتیە، وەگەرد لایەن ئیرانی لە ئیلام ڕێککەفتن کریا ئەرا زیایکردن شمارەی زیارەتکەرەیل”.
وتيش: "لە گردەوبوین وەزیرەیل ناوخۆ و پارێزگارەیل لە دەروازەی سنووریی میهران کە هەفتەیگ وەرجەیە وەڕیەو چگ، ڕێککەفتنیگ کریا کە تەنیا ئیرانییەیل لە دەروازەی سنووریی زورباتیە بچنە ناوەور کە پاکستانییەیل، ئەفغانیەیل". و نەتەوەیل ترەک وەناوهاتنیان وە فڕۆکەخانەکانەیلەو بوود و تەنیا لە دەروازەی شەلامچە لە بەسرە بوود." ئی ریکارە تەنیا لە زیارەت چلە جیوەجی کریەێد."
لەباوەت ریوبانەیل، محمد ئاشکرا کەێد کە “لەمەوقەی چگن زیارەتکەرەیل لە مەرز زورباتیە تا رەسێدە پارێزگاری واست، ریەیل ئامادە کریانە، و ری گلەوخواردن لەب هەفتە تەواو بوود، و کارەیل خاسەوکردن لە ری جەسان-دبونی ەەردەوامە و بڕیارە لە ماوەی هەفتەیگ تەواو بوود”.
وتیش: “پارێزگار واست، محمد مەیاحی، رینمایی داگە کە مەفرەزیگ پولیس و هاتوچو و وەرگری شارستانی و ئەمبولانس لە هەر 10 کیلۆمەتریگ دابنرێد، 24 ساعەت لە رووژیگ”، وتیش: “ئی رینمانییە دەرچگە چوینکە فرەی رانندەیل لە رووژەیل زیارەت خوەیان شەکەت کەن، یەیش بوودە مدوو رویداوەیل فرەیگ لە ئەنجام کەم هوچان و نەخەفتن ".
22 قەتار ئەرا هامشوو زیارەتکەرەیل
لەباوەت کارەیل هامشوو زیارەتکەرەیل، وەڕێوەبەر گشتی کڕ ئاسنین عراق، یونس ئەلکەعبی ئویشێد: “ئامادەکارییەیل فرەیگ وەگەرد هاتن مانگ موحەڕەم کریاس، مە خاسەوکردن تەواو لەبان گشت کڕەیل لە بەسرە و بەغداو ەەرەو کەربەلا ئەنجامدریا، و وێستگەی کەربەلا ئامادەس ئەرا پیشوازیکردن لە زیارەتکەرەیل”.
کەعبی لە قسەیلی ئەرا ئاژانس شەفەق نیوز وتیش: “ ئیرنگە هەڵمەتیگ گەورە جیوەجی کریەێد ئەرا پاککردن قەتارەیل تا وەشیوەیگ گونجیاگ دەربکەفن ئەرا زیارەتکەرەیل ئیمام حسێن، بەڵام لە وەخت زیارەت و لەوەر رووشنایی ئەو شمارەی فرە، بەد وەکارهاوردن قەتارەیل جاروبار وە فڕەدان خوەراک لەبان کورسییەیل بوود، ئەراوە داوا کەیمن زیارەتکەرەیل مقیەتی ئی قەتارەیلە بکەن تا ئامادەبوون ئەرا هاتنیگ ترەک چوینکە وەخت ئەرا وسیان قەتارەیل نییە تا پاکیان بکریەێد”.
وتیش: “قەتار هەفتانە لە بەسرەو وەرەو کەربەلا چوود، و یەیش لە ڕێکەفتنیگ ناوەین مر ئاسنین عراقی و هاوتا ئیرانیی زیارەتکەرەیل لە ئیرانەو بەن، بەڵام وەرد تەواوبوین پەیوەندی قەتار ناوەین هەردوگ وڵات، قەتارەیل کەفنە ری، و قەتارەیل عراقی چنە تەهران و شوینە پیرووزەیل، هەمیش قەتارەیل ئیرانی رەسنە کەربەلا”. دویای کۆتایی هاتن زیارەت، وەگورەی سەردەم کویەن گلەو خوەن ئەرا خشتەی ئاسایی خوەیان”.
لەباوەت زیارەت ئەرا سامەڕا، کەعبی ئاشکرا کەێد کە “دویای زیارەت چلە، رووژانە زیاتر لە یەک کاروان ئاسمانی وەرەو شار سامەڕا چوود، چوینکە فرە لەو کەسەیلە لە دەیشت و ناوە عراقەو چن ئەرا سەردان مەزارگە پیرووزەیل سامەڕا. هەماهەنگی وەرد مەزارگەی عەسکەرییەین پیرووز کریاس ئەرا وەڕێوەبردن قەتار لە بەغداو ئەرا سامەڕا و وە پێچەوانەو دویای تەواوکردن زیارەت چلە لە کەربەلا لە رووژەیل ئاسایی قەتار سامەڕا گشت جمعەیگ ساعەت 8 شەوەکی لە بەغداو چوود و لە ساعەت 3ی دویای نیمەڕو گلەو خوەێد.
