هەواڵی کوردستان ئێستا

شەفەق نیوز/ راپۆرتیگ ئیسرائیلی وە پشتبەسین وە رووژنامەیگ ئەمریکی ئاشکرا کرد کە داعش دووارە تیەێدە دی، یەیش هیزەیل ئەمریکا لە عراق و سوریا نیگەران کردگە، چوینکە ئامادەی ئەندامەیلی کەێد ئەرا ئەنجامدان ئۆپەراسیۆن خوەیکوشی وەبان هیزەیل هاوپەیمان ناودەوڵەتی.

رووژنامەی "جروزەلم پۆست" ئیسرائیلی لە زار راپۆرتیگ وەلایەن "وۆڵ ستریت جۆرناڵ" ئەمریکییەو، کە ئاژانس شەفەق ئەڵگەردانی کرد وت: "سەربازە ئەمریکییەیل لە سوریا تەقەلا دەن ئەرا کۆنتڕۆڵکردن داعش لە ناوچەیل ئەو وڵاتە هەرچەن وەرجەیە لەلی پاکەو کریان"، ببجگە لەوەیش، ریخریایەگە دیرێد هاز خوەی لە ناوچەی هاماری ئوردن وەدەس تیەرێد، کە لەورا ڕاهێنان وە ئەندامەیلی کەێد ئەرا ئەنجامدان پەلامار خوەیکوشی وەبان هیزەیل هاوپەیمانی.

 راپۆرتەگە لە زار سەرچەوەیل ئەمەریکی و کورد و سوریای دیموکرات بڵاو کردگە کە داعش تەقەلای زنیەوکردن "خەلافەت" دەێد، هەرچەن هاوپەیمانیەگە لە مانگ ئازار 2019 شکست وە داعش هاورد.

 راپۆرتەگە وتیش: لە ماوەی یەک ساڵ گوزەشتە ریژەی پەلامارەیل چەکدارەیل داعش لە هەردوگ وڵات سوریا و عراق دوو ئەوەنە زیای کردگە، لەناویان ئەوانەگ خاڵە ئەمنییەیل کەنە ئامانج بیجگە لە تەقانن ماشین.

 ڕاپۆرتە ئەمریکییەگە  لە زوان سەرۆک هیزەیل سوریای دیموکرات، ڕەحیلات عەفرین نویساس: “ئمساڵ بەدترین ساڵ بویە لەدویای شکست داعشەو کە چەنیگ دریەنە زەویەو، تەقەلای هەڵسیان لە نووەو دەن”.

 وتیش: لە ماوەی 6 مانگ یەکەم ساڵ 2024، داعش وەرپرسیارێتی خوەی لە 153 پەلامار لە سوریا و عراق هەڵگردیە، و کار کەێد تا هاز مرۆیی خوەی فرە بەرزەو بکەێد، لەڕی ئامادەکردن زاڕووەیل، و زنیکردن ئەو ریخریاگە تەنیا لە خوەرهەڵات ناوڕاس سنوردار نییە، کە پەلاماریگ لاوەکی لە ئەوروپا ئەنجامدریا، جویر کوشتار کۆنسێرتەگە لە مۆسکۆ.

 لە وەختیگ ڕاپۆرتەگە وە سەختی نوویگ ئەرا هیزەیل هاوپەیمانی باسی کرد، بەڵام نووڕیە کە تاکتیک ریخریایەگە جیاوازە لە جاران، کە لەجیای ئەوەگ بڕەیل گەورە لە چەکدارەیل بە تانک و دۆشکە پەلامار ئاوایەیل بیەن، چەکدارەیل دەسکردنە  تاکتیک جەنگ چەتەیل، کە لە ری خانە بوبچگەیل کار کەن وە تفەنگ و تەڵەی تەقینەوە.

 لە راپۆرتەگە هات کە هاوپەیمان ئەمریکا و هیزەیل سوریای دیموکرات توەنستنە 233 چەکدار داعش لە ناو 28 ئۆپەراسیۆن بگرن تا ئمساڵ، وتیش: "فرە لە هاوپەیمانەیل ئەمریکا نیگەرانن لە دانوسەنین لەبان کیشانەوەی ئەمریکا لە ناوچەگە".

 راپۆرتە ئەمریکییەگە هوشداری دا کە "هیزە ئەمریکییەیل هانە ژیر زووریگ تا لە عراق و سوریا دەرچن، لە وەختیگ دانوسەنین هەس لە واشنتۆن ئەرا باسکردن لە پلان ئەگەر دەرچگن".

راپۆرتەگە لە زوان قسەکەر هیزەیل ئاسایش ناوخوەیی باکوور خوەرهەڵات سوریا کە هاوپەیمان هیزەیل ئەمریکان، عەمید عەلی ئەلحەسەن، نویساس: "ئەو ئاژاوەگیڕییە دوینیمن کە وەرجەیە نەیمنە، هەر کیشانەوەیەگیش بوودە مدوو دروسبوین گورجەوبوین کوتپر خانە خەفتگەیل."

 دویای ئەوەگ لە راپۆرتەگە باس گامەیل وەدیهاتن داعش و داگیرکردن ناوچە فراوانەیل عراق و سوریا کرد و ئیجا شکستهاوردنی لە روی جوگرافیاو، باس ئەوە کرد کە کە دویای ئەوە ریخریایەگە تەقەلای ئازادکردن 9 هەزار چەکدارەگەی دا کە هیمان لە زیندانەیلن لە ری ئۆپەراسیۆنیگ وایین و وەکارهاوردن فڕۆکەی خوەیکوش ئەرا رەسین وەرەو ناو دەروازە قەڵادارەیل، بەڵام سەرکەفتی نەوی، وەلێ ئی جویرە تەقەلایگ ڕەنگدانەوەی پابەندبوین داعشە ئەرا گلەوداین دەسەڵات خوەی.

 راپۆرتەگە لە زوان عەمید ئەلحەسەن نویسان: "نیەتوەنم بارمە وەر چەوم کە ئەگەر وەڕاسی بچیانە ناو زیندانەگە چە بویاد".

 لە راپۆرتەگە وتیش؛ داعش 43 هەزار ئاوارە لە کەمپەیل سوریا و عراق وە ئەگەر جەنگاوەر زانێد، لەناویان ژن و مناڵ چەکدارەیل زیندانیکریایەیل داعش.

 لە راپۆرتەگە لە زوان عەقید ڕەحیلات باس زاڕووەیل کەمپ هۆل کەێد و ئویشێد: داعش تەقەلا دەێد مەغزیان بشوورێد لە  وەخت مناڵییان، ئەراوە هەناێ گەورە بوون وەبی دوودڵی ئامادە بوون ئەرا جەنگ.

هەمیش لە راپۆرتەگە لە زوان وەرپرسەیل ئەمنی وت:  کە کوڕەیل لە کەمپەیلەو وە قاچاخ دەرکەن وەختیگ رەسنە تەمەن جەنگکردن و دویای ئەوە لە بیاوانەیل وە چەک مەشق و ڕاهێنانیان وەپییان کریەێد.

 لە کۆتایی راپۆرتەگە هات کە “گلەوخواردن داعش جی نیگەرانییگ گەورەی هیزەیل ئەمریکاس” و لە زوان ئەفسەریگ هیزە تایبەتەیل ئەمریکا وت: “هویر ئەرا شوینیگ ترەک بریاس، بەڵام یە مەوقەی ئەوە نییە کە چەومان لە باکوور خوەرهەڵات سوریا لاوەیمن”.