هەواڵی کوردستان ئێستا

شەفەق نیوز/ رووژنامە و سایتەیل ئەنتەرنێت لە ساڵ 2015  باس خەوەریگ ئەڵاجەوی کردن کە مۆبایلیگ هشکەوبوی مەوقەی هەڵکەنین لەناو قەوریگ میژووی لە شار زالتسبورگ لە نەمسا پەیا کریاس.

ئەو وەختە زانایەیل ئاسەواری لە نەمسا کەفتنە تەقەلای رەسین وە بندروس پەیاکردنیگ کە جەهان لەرزان، و گشت فامستنە باوەیل بانوخوار کەێد.

وتنە گوایە قاڵەبیگ پەیا کریا لەشیوەی  مۆبایل، هەکاتی یەکەم نموونەیل کۆمپانیای نۆکیا، و لەبان ئەو "پارچەی ئاسەواریە" نویسانن ئەڵاجەوی کریاس، کە مینێدە نەقشەیل سۆمەری لە میزۆپۆتامیا.

وتنیش؛ قسەوباس کەفتە ناوەین زانایەیل لەبان بندروس ئەو پەیاکردنە، کە مەزەنە کردن ئەو چشتە کە جویر مۆبایلە لە عراقەو رەسیەسە نەمسا، و پسپۆڕەیل نیەزانن چەس.

بەشیگ وت؛ هاتێ هن کابرایگە لە بانانەو ئەرا گوزەشتە گلەو خواردیە، و لەبان مدوو ئەوە ئی هویرە کردن کە ئەو چشتە کە پەیا کریاس، جویر مۆبایل نۆکیا بویە.

بەشیگیان وەی قسە رازی نەوین، کە وتنە شمارە وەقەی تەختەکلیل ئی مۆبایل کوینە نییە، و بەشیگیش وتن یە دروویگە.

دەروازەی "Conspiracy Club " یەکەمین لایەن بوی ئی خەوەرە وەگەرد وینەی ئەو پەیاکردنە بڵاو کرد لە 21 ديسمبەر 2015، ئیجا رووژنامەی ئەکسپرێس بەریتانیای ئەلیکترۆنی، کە پرسیاریگ کرد کە ئایا ئەو پارچەی ئاسەواریە نشان شارستانییگ پیشکەفتگ دەێد لە سەردەمەیل کوینە بویە یا هامشوو لەناو سەردەمەیل بویە؟.

ئیکسپرێس چگە ناو باس ئەو پەیاکردنە کە وت: پسپۆڕەیل وتنە ئەو مۆبایلە هن یەکەی سیانزەی وەرجە زایینیە، و لەشوینیگ ترەک وت: تەمەنی 800 ساڵە!.

سایتیگ ترەک وەناو "MysteriousUniverse"، پشت وە شارستانیەت سۆمەری بەساد، وەناو زەکەریا سیتشینر کە ئی پسپۆڕە وت: مۆبایلە کوینەگە چوودەو ئەرا 1300 ساڵ وەرجە زایین، کە مەردمەیلیگ ئاسمانی لە هەسارەی  "نيبيرۆ" ئەرا بان زەوی هاوردنەسەی!.

دویای ئەوە کە کەسەیلیگ فرە و بەشیگ لە پسپۆڕەیل کەفتنە مەینەتی مینەکردن ئەرا رەسین وە بندروس کارەگە، و سەرچەوەی ئی مۆبایل ئاسەواری ئەڵاجەویە، تا دەرکەفت کە راسە ئی چشتە پەیا کریاس، و نەقشەیل بانی وەزوان سۆمەریە، وەلێ قەت کوینە نییە.

لە کۆتایی دەرکەفت کە دوو پەیکەرساز ئەڵمانی وەناو كارين وكارل وينگارتنر، ئەو پارچەی خەڕگینە لە يناير ساڵ 2012 دروس کردنە، و لەناو ستودیۆیگ هونەری تایبەت چاپی کردنە.

دویای ئەوە، وینەی ئەو مۆبایلە کە دروسی کردن، لەبان فەیسبووک بڵاوی کردن، و وتن: ئەگەر لە سەردەم سۆمەریەیل کوینە مۆبایل بویاتاد وەنە وەیجویرە بوی.

کارڵ لە دیداریگ رووژنامەوانی داد لە دەس بەشیگ میدیا کرد کە وەبی سڵاکردن وینەی ئەو کار هونەریە بڵاو کردنە، و نەیش باس خاوەن و سەرچەوەگەی کردنە. 

هەر وەی ئاسانیە، ئەو قسەوباسە و گەپەیلە کوورەو بوین، و دی باس ئەو مۆبایل سۆمەریە کپەو بوی.

سەرچەوە: سایت RT