هەواڵی کوردستان ئێستا

ئێران ڕۆژی دووشەممە ڕایگەیاند هیواخوازی گفتوگۆیەکە لەسەر بەرنامە ئەتۆمییەکەی " بەبێ فشاری سیاسیی "، ئەمەش پێش کۆبوونەوەی ئەنجومەنی دەزگای وزەی ئەتۆمی نەتەوە یەکگرتووەکان. وتەبێژی وەزارەتی دەرەوەی ئێران ئیسماعیل باقایی بە ڕۆژنامەنووسانی وت " سەرجەم هەوڵەکانمان و سەنگەکانمان لە گفتوگۆکانمان ئەوەیە ڕێگە بە وزەی ئەتۆمی نێودەوڵەتی بدەین کارە تەکنیکییەکەی ئەنجام بدات بەبێ فشاری ڕووخێنەر و دڕندانەی هەندێک لایەن." سەرۆکی دەزگای وزەی ئەتۆمی نێودەوڵەتی ڕافایل گرۆسی ڕۆژی چوارشەممە سەردانی ئێرانی کرد بە مەبەستی گفتوگۆکردن لەگەڵ بەرپرسانی باڵای ئەو وڵاتەدا، بە سەرۆکی ئێران مەسعود پزیشکیانیشەوە. سەردانەکە پێش کۆبوونەوەی ئەنجومەنی دەزگاکە دێت کە بڕیارە لەم هەفتەیەدا لە ڤییەنا بەڕێوەبچێت، کە تێیدا پێشبینی دەکرێت بەڕیتانیا و ئەڵمانیا و فەڕەنسا بڕیاری گرنگی نوێ دەربکەن لەسەر ئێران. باقایی هیوای خواست کە لایەنەکان " ڕێگە بدەن پرسەکانی نێوان ئێران و دەزگاکە بەردەوام بن بە شێوەیەکی تەکنیکی بەبێ فشار و بۆچوونی سیاسیی." وتی سەردانەکەی گرۆسی " سوودی هەبووە و ئەرێنی بووە ". وتی " تێگەیشتنێکی باشی " لە نێوان تاران و دەزگاکەدا دروست کرد. پزیشکیان لە ماوەی کۆبوونەوەکەیدا لەگەڵ گرۆسی وتی تاران دەیەوێت " هیچ گومان و دوودڵییەک " لەسەر بەرنامە ئەتۆمییەکەی نەهێڵێت. لە ساڵی 2019 ەوە ئێران چالاکییە ئەتۆمییەکانی زیاتر کردووە، ئەوەش دوای ئەوەی سەرۆکی ئەو کاتەی ئەمەریکا دانۆڵد ترامپ لە ڕێککەوتنە ئەتۆمییەکەی ساڵی 2015 ی نێوان ئێران و زلهێزەکانی جیهان کشایەوە و سەرجەم سزاکانی سەپاندەوە بەسەر تاراندا. مەبەست لە ڕێککەوتنەکە سنووردارکردنی چالاکییە ئەتۆمییەکانی ئێران بوو لە بەرامبەر لابردنی سزا نێودەوڵەتییەکان لەسەری. سەرچاوە/ دەنگی ئەمەریکا