مردن نادیاریگ کابرایگ دەسوەسەرکریاگ لە بنکەی پۆلیس لە باشوور عراق
2024-12-22 12:06:02 - سەرچاوە: شەفەق نیوز
شەفەق نیوز/ شەوەکی ئمڕوو یەکشەممە، یەکیگ لە دەسوەسەرکریاگەیل ناو بنکەی پۆلیس شلامجە لە پارێزگای بەسڕە، گیان لەدەسدا لە بارودۆخ نادیاریگ
نویسینگەی کۆمیسیۆن باڵای ماف مرۆڤ لە بەسڕە وە پای بەیاننامەیگ رەسیە ئاژانس شەفەق نیوز راگەیان، وەدویاچگن ئەرا رویداو مردن یەکیگ لە زیندانیەیل بنکەی پۆلیس شلامجە کەن کە وەپای مادەی 5 لە یاسای هێزەیل ئەمنی ناوخوەیی دەسوەسەرکریاس.
ئاشکرایکرد، ئەو کەسە ئەندام هێزە ئەمنیەیل بویە و لەداڵگبوی ساڵ 1979یە، وەپای زانیاری سەرەتایەگان هووکار مردنەگەی چوودەو ئەرا هەوکردن جگەر ڤایرۆسی و بەرزەوبوین پەستان خوین.
دیاریکرد، وەدویاچگن لە دۆسیەگە کردنە وەگەرد پۆلیس بەسڕە، چەوەڕێ راپۆرت پزیشک دادوەرین، ئەرا دیاریکردن هووکارەگەی وە هویردی.
